Gesami Hea:su 24 - GODE EA SIA: IDA:IWANE GALA

Hina Bagadedafa

¹ Osobo bagade amola liligi huluane amo ganodini dialebe da Hina Gode Ea: fawane. Osobo bagade dunu fifilai huluane amo ganodini esala da Hina Gode Ea: fawane.

² Ea da osobo bagade amo hano lugudu osobo hagudu dialebe amo da:iya hiougi. Amola Ea da hano wayabo bagade amo, ea lugudu sogebi amoga osobo bagade ea bai fa:si.

³ Nowa dunu da Hina Gode Ea agoloba:le heda:mu da defele galoma:bela:? Nowa dunu da Ea sia:ne gadosu hadigi diasu ganodini golili sa:imu da defele galoma:bela:?

⁴ Nowa ilia hou amola asigi dawa:su amo ganodini ledo hame galea, amola loboga hamoi liligi amoma hame sia:ne gadobeba:le, amola ogogosu hou hame dawa:beba:le, amo dunu fawane da Hina Godema heda:mu defele ba:mu.

⁵ Hina Gode da amo dunuma hahawane bagade imunu. Amola E da ilia wadela:i hou da dodofei dagoi sia:mu.

⁶ Dunu amo da Godema maha, ilia hou da agoaiwane gala. Agoai dunu da Ya:igobe Ea Gode Ea midadini maha.

⁷ Logo ga:su ha:gi gaguia gama! Hina Bagade ganodini misa:ne, hea logo ga:su, ili doasima!

⁸ Amo Hina Bagade da nowala:? E da Hina Gode amola E da baligili gasa bagade. E da gegesu ganodini hasala.

⁹ Logo ga:su ha:gi gaguia gama! Hina Bagade ganodini misa:ne, hea logo ga:su, ili doasima!

¹⁰ Amo Hina Bagade da nowala:? Hasalasu Hina Gode, Hi fawane da amo Hina Bagadedafa.