Gesami Hea:su 17 - GODE EA SIA: IDA:IWANE GALA

Bidi Hame Hamosu Dunu amo Fidima:ne Sia:ne Gadosu

¹ Hina Gode! Na sia:be goe nabima. Na moloidafa fofada:su ba:ma:ne Dima edegesa. Na da Dia na fidima:ne Dima diginiwane wele sia:sa. Dia nabima. Na da ogogole hame sia:ne gadosa.

² Dia da na moloidafa hou dawa:beba:le, Dia da na fidima:ne fofada:mu.

³ Dia na dogo dawa:. Di da gasi ganodini nama misini, na hou huluane abodele ba:su. Di da na hou amo ganodini, wadela:i hanai hou hamedafa ba:i.

⁴ Eno dunu da wadela:i sia: bagade sia:sa. Be na lafiga agoai hame sia:sa. Na da Dia hamoma:ne sia:i amo fa:no bobogei. Amola nimi bagade hou amoma hame fa:no bobogei.

⁵ Na da eso huluane Dia logodili ahoasu amola na da afuda:le hamedafa asi.

⁶ Hina Gode! Na Dima sia:ne gadosu amo da Dia na sia:ne gadobe bu alofele iaha. Amaiba:le, nama ba:leguda:le, na sia nabima.

⁷ Dia asigidafa hou amo nama olelema amola na gaga:ma. Na da Di guga esalea, na da na ha lai ilima gaga:i dagoi ba:sa.

^8-10 Di da Dia si amoma gaga:su hou amo defele, na gaga:ma. Wadela:i hamosu dunu da nama doagala:sa:besa:le, Dia ogelebaha na wamolegema. Nimi bagade ha lai dunu da na guba:le sisiga:sa. Ilia da asigi hou hame dawa: amola ilia da gasa fili sia: daha.

¹¹ Ilia da na sisiga:le disi. Ilia da na hiougia gudumusa: logo hogoi helesa.

¹² Ilia da soge laione wa:me agoai, na desega aligili medole manusa: amola dodosa:ne manusa: oulela.

¹³ Hina Gode misa! Na ha lai ilima gegene sefasima. Amola, ilima hasalasima. Dia gobihei bagade amoga gegebeba:le, na gaga:ma.

¹⁴ Wadela:i hamosu dunu da osobo bagadega esalea, ilia da ilia hanai liligi huluane gagusa. Ilia da nama ha laiba:le, Di na gaga:ma. Dia da se iasu bagade ilima ima:ne, gagadole ilegei dagoi. Amo se iasu da ilima ianu, ili baligili amola ilia mano amola ilia mano ilia mano amo defele ilima se iasu ima:ne ba:mu da defea.

¹⁵ Be na da wadela:le hame hamoiba:le, na da Di ba:mu. Amola, na da nedigisia, Di guga esalebeba:le, na da hahawane bagade ba:mu.