Gesami Hea:su 16 - GODE EA SIA: IDA:IWANE GALA

Hina Godema Gasa Gala Dafawaneyale Dawa:su

¹ Gode! Dia na gaga:ma! Dia da na ouligisa amo na dafawaneyale dawa:be.

² Na da Hina Godema amane sia:sa, “Di da na Hina Gode. Na liligi noga:i huluane na gagusa, amo Di fawane da nama iaha.”

³ Hina Gode Ea dafawaneyale dawa:su dunu da ida:iwane dunu fi. Na da ilima gilisisia, hahawane baligili ba:sa.

⁴ Nowa dunu da Godedafa fisili, eno ogogosu ‘gode’ ilima fa:no bobogebe da se nabasu bagade ba:sa. Na da ilia gobele salasu hou amoga hame gilisimu. Na da ilia ‘gode’ liligi ilima hame nodone sia:ne gadomu.

⁵ Hina Gode! Di fawane da na Gode. Di da na dawa:i liligi huluane nama iaha. Hou da hobea nama doaga:mu, amo Di fawane ouligisa.

⁶ Dia udigili nagili iasu liligi da noga:idafa amola ida:iwane.

⁷ Hina Gode da na masunu logo olelebeba:le, na da Ema nodosa. Amola, gasia na asigi dawa:su da nama sisasu olelesa.

⁸ Na da eso huluane Hina Gode da nama gadenene aligisa, amo na dawa:. Hou huluane nama doaga:sea amoma na da hame dafamu.

⁹ Amola na da nodosa amola hahawane amola na dawa:loba, na da gaga:i dagoi.

¹⁰ Bai Dia da bogosu logo ea gasa amoga na gaga:i dagoi. Amola Di da na dogolegeiba:le, Dia da na bogosu soge ganodini dasama:ne hame yolesimu.

¹¹ Di da logo amo da esalusu amoga doaga:sa, amo logo Di da nama olelemu. Di da nama gadenene esalebeba:le, na da hahawane bagade. Amola na da mae fisili eso huluane hahawane ba:lalumu.