Gesami Hea:su 146 - GODE EA SIA: IDA:IWANE GALA

Gaga:su Godema Nodosu

¹ Hina Godema nodoma! Na dawa:su amoga Hina Godema nodoma!

² Na da esalobawane, na esalebe we huluane Godema nodone gesami hea:su hamonanumu.

³ Osobo bagade ouligisu dunu ilima dafawaneyale mae dawa:ma! Osobo bagade dunu, ilia di gaga:mu hamedei.

⁴ Ilia da bogosea, gulu dou amoma buhagisa. Amo esoga, ilia hamomusa: ilegei da dagosa.

^5-6 Nowa dunu da Ya:igobe ea Gode amoea fidima:ne dawa:sea da hahawane gala. Hina Gode da mu amola osobo bagade amola hano wayabo bagade amola amo ganodini liligi huluanedafa hahamoi dagoi. Nowa da Ema dafawaneyale dawa:sea, da hahawane bagade gala. E da Ea hamomusa: ilegele sia:i huluane didili hamosa.

⁷ E da banenesi dunu fidima:ne, moloidafa fofada:su hamosa. E da ha:be dunuma ha:i manu iaha.

⁸ Hina Gode da se iasu diasua esalebe dunu fadegalesisa. E da si dofoi dunu ilia si fadegalesisa. E da dafai dunu bu wa:lesisa. E da Ea moloidafa dunuma asigisa.

⁹ E da degabo misi dunu ninia soge ganodini esalebe, amo gaga:sa. E da didalo amola guluba: mano fidisa. Be E da wadela:i hou hamosu dunu ilia ilegesu gugunufinisisa.

¹⁰ Hina Gode da eso huluane Hinadafa esalalalumu. Saione fi! Dilia Gode da eso huluane fifi ahoana, dili ouligilalumu. Hina Godema nodoma!