Gesami Hea:su 143 - GODE EA SIA: IDA:IWANE GALA

Godea Fidima:ne Gesami Hea:su

¹ Hina Gode! Na sia:ne gadobe nabima! Di da mae fisili, moloidafa hou hamonanebeba:le, na adole ba:be nabima!

² Na da Dia hawa: hamosu dunu! Nama mae fofada:ma! Bai dunu afae da Dia siga ba:sea, moloidafa da hame gala.

³ Nama ha lai dunu da na desega misini, na hasalasi dagoi. Ea da na gasidafa se iasu diasu ganodini sali. Wali na da dunu da hemonega bogoi agoane ba:sa.

⁴ Amaiba:le na da yolesimusa: dawa:lala. Na da baligili heawini da:i dioi gala.

⁵ Na da eso musa: asi amo dawa:lala. Dia musa: hamosu na da dawa:lala.

⁶ Na da lobo gaguia gadole, Dima sia:ne gadolala. Hafoga:i osobo da gibu sa:ima:ne dawa:lalebe, amo defele na da Di nama misa:ne hanai gala.

⁷ Hina Gode! Wahadafa nama dabe adole ima! Na da hamoma:beyale dawa:lusu huluane fisi dagoi. Na da bogoi sogebia dasa:besa:le, Dia naba:le mae wamoaligima!

⁸ Hahabe huluane, Dia mae fisili asigidafa hou nama buga:le adole ianoma. Bai na da Dia hou dafawaneyale dawa:sa. Na sia:ne gadosu da Dima gado heda:sea, na masa:ne idi olelema.

⁹ Na da Dia gaga:su hou lama:ne, Dima ahoa. Na ha lai dunu da na hasalasa:besa:le, Dia gaga:ma.

¹⁰ Di da na Gode! Dia hanai na hamoma:ne, nama olelema. Nama hou noga:i hamoma, amola na gaga:iwane masa:ne, idi noga:i nama olelema.

¹¹ Hina Gode! Dia gaga:musa: ilegei defele, na gaga:ma. Dia noga:idafa hou amoga na gaga:ma.

¹² Dia da nama asigiba:le, na ha lai dunu medole legema! Na banenesisu dunu amo gugunufinisima. Bai na da Dia hawa: hamosu dunu.