Gesami Hea:su 140 - GODE EA SIA: IDA:IWANE GALA

Gaga:ma:ne Sia:ne Gadosu

¹ Hina Gode! Wadela:i hamosu dunu amola nimi bagade gegesu dunu da nama hasalasisa:besa:le, Dia na gaga:ma.

² Ilia da eso huluane wadela:le hamomusa: ilegelala. Ilia da eso huluane sia:ga gegesa amola sia:waisa.

³ Ilia gona:su da medosu sania defele gala. Ilia sia: da saya:be ea medosu defo hano defele gala.

⁴ Hina Gode! Wadela:i hamosu dunu ilia gasaga na banenesisa:besa:le, na gaga:ma. Nimi gegesu dunu da na dafama:ne ilegesa. Dia na gaga:ma!

⁵ Hidale gasa fibi dunu da na sa:ima:ne sanenesisi. Ilia da na gagulaligima:ne, logoba:le sanenesisu.

⁶ Na da Hina Godema amane sia:sa, “Di da na Gode! Hina Gode! Na fidima:ne digini wele sia:be nabima!

⁷ Na ouligisudafa Hina Gode! Na gasa bagade Gaga:su Dunu! Dia da gegesu ganodini na gaga:i.

⁸ Hina Gode! Wadela:i hamosu dunu ilia hanai liligi ilima mae ima. Ilia wadela:i hamoma:ne ilegesu amo hedofama.

⁹ Na ha lai dunu da na hasalasisa:besa:le, ilia logo hedofama. Ilia nama se ima:ne sia:su da sinidigili, ilima se ima:ne, Dia hamoma.

¹⁰ Gia:i bagade lalu oso da ili da:iya sa:imu da defea. Ilia da uli dogoi ganodini dafane, bu hame heda:mu da defea.

¹¹ Dunu amo da eno dunuma ogogole diwaneya udidisia, ilia hamobe da didili hame hamomu da defea. Dodona:gi gegesu dunu da wadela:su liligi amoga gugunufinisi dagoi ba:mu da defea.

¹² Hina Gode! Na dawa:, Di da hame gagui dunu amola hahanibi dunu ilia hou gaga:sa.

¹³ Moloidafa dunu ilia da Dima nodone sia:ne, Dia midadi esalumu.