Gesami Hea:su 14 - GODE EA SIA: IDA:IWANE GALA

Osobo Bagade Dunu Ilia Wadela:i Hou

¹ Gagaoui dunu da ilisu amane sia:sa, “Gode da hamedafa esala.” Ilia huluane da wadela:i hou hamoi dagoi. Dunu afae hou moloidafa hamosa, amo da hame ba:su.

² Hina Gode da Ea Hebene esalebe amoga osobo bagade dunu ba:lala. Amola E da bagade dawa:su dunu amola Ema nodosu dunu habowali lale hogosa.

³ Be hame ba:sa. Ilia huluane giadofai dagoi. Ilia da huluane defele wadela:idafa. Dafawane! Dunu afae da hou moloi hamedafa hamosa.

⁴ Hina Gode da amane adole ba:sa, “Ilia da hame dawa:bela:? Amo wadela:i hamosu dunu huluane da hame dawa:su dunula:? Ilia da hawa: hamosu hame hamosa. Be Na fi dunu ilima wamolasu fawane hamosa. Amola, ilia da Nama hame sia:ne gadosa,” Hina Gode da amane sia:sa.

⁵ Be Gode da Ema nabasu dunu amo fawane fidibiba:le, ilia da beda:i bagade ba:mu.

⁶ Wadela:i gasa fi dunu da fonoboi hamoi dunu ea hou wadela:lesisa. Be Hina Gode da fonoboi dunu amo gaga:sa.

⁷ Na sia:ne gadosu da agoane. Hina Gode da Saione Goumi amoga Isala:ili fi ilima baligisu hou hahawane imunu da defea. Amasea, Hina Gode da Isala:ili dunu ilima ilia bu didili hamoma:ne hamosea, ilia da hahawane bagade ba:mu.