Gesami Hea:su 139 - GODE EA SIA: IDA:IWANE GALA

Gode Ea Bagade Dawa:su Hou amola Ouligisu Hou

¹ Hina Gode! Dia da na hou abodele, huluane dawa:.

² Dia da na hamobe huluanedafa dawa:. Di da badiliawane lela, na asigi dawa:su huluane dawa:.

³ Na da hawa: hamonanea amola hele esalea, na hamobe huluane Dia dawa:.

⁴ Na da hame sia:iawane, na sia:musa: dawa:i huluane Dia dawa:.

⁵ Di da na sisiga:le, Dia gasaga na gaga:i diala.

⁶ Dia na hou dawa:digi da oso dogoi. Be na da Dia hou dawa:digimu da hamedei.

⁷ Na da Diba:le hobeamu da hamedei. Na da Dia midadi fisili hobeamu da hamedei.

⁸ Na da muagado heda:i ganiaba, Di da amogawi esalebe ba:la:loba. Na da bogosu sogebia asiaba, Di da amogawi esalebe ba:la:loba.

⁹ Na eso maba gusu hagili ahoa ganiaba, o guma:dini badiliadafawane esala ganiaba,

¹⁰ Di da amogai na oule bisili masa:ne amola na fidima:ne esalebe ba:la:loba.

¹¹ Na da gasi ea na wamolegema:ne adole ba:loba, o hadigi nama sisiga:i dialebe amoea afadenene bu gasima:ne adole ba:loba, na da wamolegei dagoi hame ba:la:loba.

¹² Bai gasi dunasi da Dima gasi hame gala, amola gasi da Dia siga eso ea hadigi agoai ba:sa. Gasi amola hadigi da Dima defele ba:sa.

¹³ Di da na da:i huluane hahamoi. Di da na da:i huluane na:me ea hagomo ganodini disisi.

¹⁴ Dunu huluane da Diba:le beda:mu da defea. Amaiba:le, na Dima nodosa. Dia hamobe huluane da degabo amola noga:idafa. Amo huluane na dawa:.

¹⁵ Di da na gasa na:me ea hagomo ganodini noga:le hahamone, disisilaloba, na da amogawi wamowane alelaloba, na da amogawi esaloba, Di da na dawa:digi dagoi.

¹⁶ Na da hame lalelegeiawane, Dia na dawa:i. Na da hame lalelegeiawane na esaloma:ne ilegei, amo Di da Dia meloa amo ganodini dedene legei.

¹⁷ Gode! Dia asigi dawa:su amo na dawa:mu bagadewane gogolesa. Dia asigi dawa:su da bagohame gala.

¹⁸ Na da Dia asigi dawa:su idisa ganiaba, ilia da idimu gogolei, sa:i boso su idi agoai gala:loba. Na da nedigisia, Di amola ani gilisili esalebe ba:sa.

¹⁹ Gode! Na dawa:loba da Dia wadela:i hamosu dunu fane lelegemu. Na dawa:loba da mosolasu dunu na yolesima:mu.

²⁰ Ilia Dima lasogole baligidu sia: daha. Ilia Dia Dio amoma lasagole sia:sa.

²¹ Hina Gode! Na da Dima higabe dunu ilima bagade higasa. Na da Dima ododoga:be dunu ilima higasa.

²² Na da ili dafawanedafa higasa. Ilia da nama ha lai dunu agoai ba:sa.

²³ Gode! Na asigi dawa:su, Dia abodema! Nama adoba:le, na asigi dawa:su hogole ba:ma.

²⁴ Na wadela:iyale, Dia hogole ba:ma! Amola Dia fifi ahoanusu logoga masa:ne, nama logo olema.