Gesami Hea:su 138 - GODE EA SIA: IDA:IWANE GALA

Hina Godema Nodone Sia:ne Gadosu

¹ Hina Gode! Na dogo huluane amoga Dima nodone sia:sa. Na da ogogosu ‘gode’ huluane ilia midadi Dima nodone gesami hea:mu.

² Na da Dia hadigi Debolo diasu amoga ba:legale, beguduli, Dia Dio amoma nodone sia:sa. Bai Dia asigidafa hou da hame fisisa. Amola Dia Dio amola Dia hamoma:ne sia:su da baligili bagade, amo Di da olelei dagoi.

³ Na da Dima wele sia:beba:le, Di da nama dabe adole i. Di da Dia gasaga, nama gasa i.

⁴ Osobo bagade hina bagade dunu huluane, ilia da Dima nodomu. Bai ilia da Dia ilegele sia:su nabi dagoi.

⁵ Ilia da Dia hawa: hamoi amola Dia hadigidafa hou olelema:ne, gesami hea:mu.

⁶ Di da gadodafa esala. Be Di da amo mae dawa:le, fonoboi dunu amo noga:le ouligisa. Amola hidale gasa fibi dunu da Dima wamoaligimu hame dawa:.

⁷ Na da bidi hamosu amoga sisiga:i ba:sea, Dia na gaga:sa. Di da nama ha lai dunu ilima dabe gegesa amola Dia gasa bagade amoga na gaga:sa.

⁸ Di da Dia ilegele sia:i defele, didili hamomu. Hina Gode! Dia asigidafa hou da mae fisili, eso huluane dialumu. Dia hawa: muni hamobe amo didili hamoma.