Gesami Hea:su 135 - GODE EA SIA: IDA:IWANE GALA

Nodone Gesami Hea:su

¹ Hina Godema nodoma! Dilia Hina Gode Ea hawa: hamosu dunu! Hina Gode Ea Dio nodone gaguia gadoma!

² Dilia amo da ninia Hina Gode Ea Debolo diasu ganodini lela. Ema nodoma!

³ Hina Godema nodoma! Bai E da noga:idafa. Ea Dio nodone gaguia gadoma! Bai E da asigidafa.

⁴ E da Ya:igobe Emagama:ne ilegei. E da Isala:ili fi dunu Emagama:ne ilegei.

⁵ Na dawa:, Hina Gode da bagadedafa. E da eno ‘gode’ huluane baligi dagoi.

⁶ E da mu amola osobo bagade amola hano wayabo bagade, amola hano wayabo lugudu, amo ganodini Ea hanaiga fawane hamosa.

⁷ E da osobo bagade bega:, mulu misusa: ginafoi amo oule maha. E da mulu misa:ne, ha:ha:na gala:sa. E da Ea liligi ligisisu diasuga, fo oule maha.

⁸ E da Idibidi sogega, magobo dunu mano, amola ohe fi magobo gawali, amo huluane defele, fane lelegei.

⁹ Amogawi, E da hina bagade, amola ea eagene ouligisu dunu ilima se dabe ima:ne, musa: hame ba:su gasa bagade hou hamoi.

¹⁰ E da fifi asi gala bagohame gugunufinisili, amola gasa bagade hina bagade dunu fane lelegei.

¹¹ E da Saihone (A:moulaide fi dunu ilia hina bagade) amola Oge (Ba:isia:ne fi hina bagade) amola Ga:ina:ne soge hina bagade dunu huluane fane lelegei.

¹² E da ilia soge huluane samogene, Ea Isala:ili fi dunu ilima sagoi dagoi.

¹³ Hina Gode! Eso huluane, dunu ilia da Di fawane da Godedafa sisia: lamu. Fifi manebe huluanedafa, ilia da Di hame gogolemu.

¹⁴ Hina Gode da Ea hawa: hamosu dunu ili gaga:mu. Bai ilia da hahani amola E da ilima asigisa.

¹⁵ Dunu fifi asi gala ilia ‘gode’ da dunu ilia loboga silifa amola gouliga hamoi dagoi

¹⁶ Ilia da lafi gala, be sia: baoumu hamedei. Ilia da si gala, be ba:mu gogolesa.

¹⁷ Ilia da ge gala be nabimu hamedei. Ilia da mi gala, be amoga gaha amola gabusiga: nabimu hamedei.

¹⁸ Dunu da amo loboga hamoi ogogosu ‘gode’ hahamoi amola ilima dafawaneyale dawa:sa, ilia da afadenene, amo ogogosu liligi ilia hamoi, amo defele hamomu da defea.

¹⁹ Isala:ili fi dunu! Hina Godema nodoma! Gode Ea gobele salasu dunu! Ema nodoma!

²⁰ Dilia Lifai dunu! Hina Godema nodoma! Dunu huluane amo da Ema nodone sia:ne gadosa! Ema nodoma!

²¹ Saione Moilai Bai Bagade amo ganodini, Hina Godema nodoma! Yelusaleme da Ea esalebe moilai. Amo ganodini, Ema nodoma! Hina Godema nodoma!