Gesami Hea:su 132 - GODE EA SIA: IDA:IWANE GALA

Debolo Diasua Nodosu

¹ Hina Gode! Da:ibidi amola ea se baligili nabasu, amo mae gogolema!

² Hina Gode! Di da Ya:igobe ea Gode Bagadedafa. Da:ibidi ea Dima ilegele sia:i amo mae gogolema! E amane ilegele sia:i,

^3-5 “Na da na diasua hame masunu amola hame golamu, amola hele mae fili galeawane, Hina Gode (Ya:igobe ea Gode Bagadedafa) Ea: diasu gagumu.”

⁶ Ninia da Bedeleheme moilaiga esaloba, Dia Gousa:su Sema Gagili ea hou nabi. Ninia da amo hogolala, Yialimi soge ganodini dialebe ba:i.

⁷ Ninia amane sia:i, “Ninia Hina Gode Ea diasuga afia:la:di. Ninia Ea Fisu midadi nodone sia:ne gadomusa: afia:la:di.

⁸ Hina Gode! Debolo diasuga misa! Amola Dia Gousa:su Sema Gagili da Dia gasa bagade hou dawa:digima:ne olelesuba:le, amo Dia gaguli misini, amogawi mae fisili, eso huluane esalalaloma!

⁹ Dia gobele salasu dunu da eso huluane moloidafa hou abula agoane salimu da defea. Dia fi dunu ilia hahawaneba:le gesami hea:mu da defea.

¹⁰ Di da Dia hawa: hamosu dunu Da:ibidi, ema ilegele sia:i dagoi. Amaiba:le, Dia ilegei hina bagade amo higale mae yolesima.

¹¹ Di da Da:ibidima dafawanedafa ilegele sia:su hamoi, amola amo ilegele sia:i Di da hamedafa bugimu. Di amane ilegele sia:i, “Na da dia mano afae amo hina bagade hamomu, amola e da di bagia Isala:ili fi ouligilalumu.

¹² Dia mano ilia Na gousa:su noga:le nabasea, amola Na hamoma:ne sia:i ilima i, amo nabawane hamosea, ilia mano amola da di bagia, eso huluane mae fisili, Isala:ili fi ouligilalumu.”

¹³ Hina Gode da Saione Moilai Bai Bagade amo ganodini E esaloma:ne, ilegei dagoi.

¹⁴ E amane ilegele sia:i, “Na da Saione Moilai Bai Bagade amo ganodini eso huluane fifi ahoanumu. Na da amogawi Isala:ili fi ouligilalumu hanai galebe.

¹⁵ Na da Saione fi dunu ilia esaloma:ne lamu liligi defele ilima imunu. Na da Saione Moilai Bai Bagadega esalebe hame gagui dunu, ilima sadima:ne ha:i manu imunu.

¹⁶ Na da Saione fi ilia gobele salasu dunu, ilia hamobe huluane amo ganodini, gaga:su hou abula agoane ilima imunu. Amola Saione fi dunu da hahawaneba:le, gesami hea:mu amola wele sia:mu.

¹⁷ Goegawi, Na da Da:ibidi egaga fi Dunu afae amo Hina Bagadedafa hamomu. Amola Na da Na ilegei Hina Bagade Ea ouligisu hou noga:le gaga:mu.

¹⁸ Na da Ea ha lai dunu amo gogosiama:ne hamomu. Be Ea ouligibi da bagade gaguiwane heda:mu.”