Gesami Hea:su 128 - GODE EA SIA: IDA:IWANE GALA

Hina Godema Nabawane Fa:no Bobogesea, Bidi Lamu

¹ Nowa da Hina Gode Ea hamoma:ne sia:i nabawane hamone, Ema fa:no bobogesea, ilia da hahawane bagade ba:mu.

² Di da di hawa: hamobeba:le, ha:i manu amola labe huluane defele ba:mu. Di da bagade gaguiwane amola hahawane esalebe ba:mu.

³ Dia uda da waini efe (amo da fage bagohame legesa) amo defele dia diasu ganodini esalebe ba:mu. Amola dia mano ilia da waha heda:be olife ifa amo da dia ha:i manu fafai sisiga:le bugi dialebe agoai ba:mu.

⁴ Nowa da Hina Gode Ea sia: nabawane hamosea, e da amo hahawane hou ba:mu.

⁵ Hina Gode da Saione Goumiga amodili hahawane dogolegesu dima imunu da defea. Di da dia esalebe eso huluane ganodini, Yelusaleme bagade gaguiwane dialebe ba:mu da defea.

⁶ Di da dia aowalalia fifi mabe ba:musa:, esalumu da defea. Isala:ili fi dunu da olofole esaloma:ma!