Gesami Hea:su 122 - GODE EA SIA: IDA:IWANE GALA

Yelusaleme Moilai Bai Bagade amoma Nodosu

¹ Ilia da nama amane sia:i, “Ninia Hina Gode Ea diasuga ahoa:di!” Amo sia: nababeba:le, na da hahawane ba:i.

² Amola wali ninia da guiguda: lela, Yelusaleme gagoi ganodini lelefula.

³ Yelusaleme da moilai bai bagade noga:ledafa bu buga:le gagui diala.

⁴ Isala:ili fi huluane da amogawi Hina Gode Ea hamoma:ne sia:i defele, Ema nodone sia:musa: maha.

⁵ Goegawi, Isala:ili hina bagade dunu da ilia fi dunuma fofada:musa: fi dialu.

⁶ Yelusaleme da olofosu ba:ma:ne, Godema amane sia:ne gadoma, “Dunu amo da di Yelusaleme, amoma asigi galea, ilia bagade gaguiwane esalumu da defea.

⁷ Dia gagoi dobea ganodini amola dia hina bagade diasu ganodini, olofosu amola gaga:su hou fawane dialumu da defea.”

⁸ Na da na sosogo fi amola na na:iyado dunu amoma asigiba:le, na da Yelusaleme amoma amane sia:sa, “Olofosu dima dialoma!”

⁹ Na da ninia Hina Gode Ea diasu amoma asigiba:le, na da Yelusaleme da bagade gaguiwane dialoma:ne Godema sia:ne gadosa.