Gesami Hea:su 120 - GODE EA SIA: IDA:IWANE GALA

Fidima:ne Sia:ne Gadosu

¹ Na da bidi hamosu ba:beba:le, Hina Godema wele sia:i. Amola E da nama dabe adole i.

² Ogogosu dunu da nama hasalasisa:besa:le, Dia na gaga:ma.

³ Dilia ogogosu dunu! Gode da dilima adi hamoma:bela:? E da habodane dilima se dabe ima:bela:?

⁴ Amabela:? E da dadi gagui dunu ea dadi agei o lalu oso gia:i bagade amoga se dabe ima:bela:?

⁵ Dili bisili fifi labe da wadela:idafa Misiege amola Gida dunu fi amo ganodini ili bisili fifi labe defele gala.

⁶ Na da eso bagohamedafa fifi lai amo da olofosu higasa, amo ganodini esalebe ba:i.

⁷ Na da olofoma:ne ilima sia:sea, ilia da ha lamusa: fawane dawa:sa.