Gesami Hea:su 115 - GODE EA SIA: IDA:IWANE GALA

Gode da Afadafa Fawane Esala

¹ Hina Gode! Ninia da Dia hadigidafa hou amoma fawane nodomu da defea. Dunu da nini hadigi gala sia:mu da defea hame. Bai Di fawane da mae fisili, asigidafa hou hamonana, amola nini fisima:ne hame dawa:.

² Fifi asi gala dunu da abuliba:le, “Dilia Gode da habila:?” amane sia:sala:?

³ Bai ninia Gode da Hebene ganodini esala. Amola E da Hi hanaiga fawane hamosa.

⁴ Eno fifi asi gala ilia ‘gode’ da silifa amola gouliga hamoi liligi, osobo bagade dunu ilia loboga hamoi fawane.

⁵ Ilia da lafi gala, be sia: baoumu hame dawa:. Ilia da si gala, be ba:mu gogolesa.

⁶ Ilia da ge gala be nabimu hamedei. Ilia da mi gala, be amoga gaha amola gabusiga: nabimu hamedei.

⁷ Ilia da lobo gala, be digili ba:mu hamedei. Ilia da emo gala be masunu gogolesa. Ilia da ouiya:le diala.

⁸ Dunu da amo loboga hamoi ogogosu ‘gode’ hahamoi amola ilima dafawaneyale dawa:sa, ilia da amo ogogosu liligi ilia hamoi, amo defele hamomu da defea.

⁹ Be dilia Isala:ili fi dunu! Hina Godema dafawaneyale dawa:ma! E da dili fidisa amola gaga:sa.

¹⁰ Dilia Gode Ea gobele salasu dunu! Hina Godema dafawaneyale dawa:ma! E da dili fidisa amola gaga:sa.

¹¹ Dilia Hina Godema nodone sia:ne gadolalebe dunu! Hina Godema dafawaneyale dawa:ma. E da dili fidisa amola gaga:sa.

¹² Hina Gode da nini dawa:lala, amola ninima hahawane hou imunu. E da Isala:ili fi dunu amola Gode Ea gobele salasu dunu huluane Ilima hahawane imunu.

¹³ E da dunu huluane, bagade amola fonobahadi defele, ilia da Ema nodone dawa:sea, ilima hahawane hou imunu.

¹⁴ Hina Gode da dili amola diligaga fi dunuma mano imunu da defea.

¹⁵ Hina Gode da mu amola osobo bagade hahamoi. E da dilima hahawane hou imunu da defea.

¹⁶ Hebene da Hina Gode Ea Hisu soge. Be E da osobo bagade amo nini osobo bagade dunuma i dagoi.

¹⁷ Bogoi dunu ilia da ouiya:i soge amoga gudu daha. Bogoi dunu, ilia Hina Godema nodone sia:mu hamedei ba:sa.

¹⁸ Be nini esalebe dunu, ninia da Ema eso huluane mae fisili, nodonanumu. Hina Godema nodoma!