Gesami Hea:su 113 - GODE EA SIA: IDA:IWANE GALA

Hina Gode Ea Noga:idafa Hou amoma Nodosu

¹ Hina Godema nodoma! Dilia Hina Gode Ea hawa: hamosu dunu! Ea Dio amoma nodone sia:ma!

² Ea Dio amoma mae yolele, wali amola eso huluane nodonanumu da defea.

³ Gusudili amola guma:dini fi! Dilia Hina Gode Ea Hadigi Dio amoma nodone sia:ma.

⁴ Hina Gode da fifi asi gala, amo huluane ouligisa. Ea hadigi da mu sasanoi.

⁵ Ninia Hina Gode agoai eno da hamedafa gala. E da gadodafa amoga fisa.

⁶ Be E da mu amola osobo bagade ba:musa: begudusa.

⁷ E da hame gagui dunu amo da gulu dabolei esalebe, amo gaguia gadosa. E da hahani dunu se nabawane esalebe, amo gaguia gadosa.

⁸ E da amo hame gagui amola hahani dunu ili Ea fi hina bagade dunu mano ilia sama agoane hamosa.

⁹ E da aligime uda ea diasu ganodini esalebe ili nodone fidisa. E da e hahawane ba:ma:ne, mano ema iaha. Hina Godema nodoma!