Gesami Hea:su 108 - GODE EA SIA: IDA:IWANE GALA

Ha Lai Dunu Hasalasima:ne Sia:ne Gadosu

¹ Gode! Na da Dima dafawaneyale dawa:i dagoi. Na da Dima nodosa gesami hea:mu amola Dima nodomu.

² Na a:silibu! Nedigima! Na sani baidama amola na ‘laia’ dusu liligi! Nedigima! Na da amoga eso didilisimu!

³ Hina Gode! Na da fifi asi gala amo ganodini Dima nodomu! Na da dunu fifi asi gala huluane amo ganodini Dima nodone sia:mu.

⁴ Dia mae fisili asigidafa hou da muagado doaga:sa! Dia hame fisisu hou da muagado digila heda:sa!

⁵ Gode! Dia gasa bagade hou amo muagado ganodini olelema! Amola Dia hadigi hou amo osobo bagade fifi asi gala dunu huluane ba:ma:ne, olelema!

⁶ Dia gasa bagade amoga nini gaga:ma! Dunu amo da Dia dogolegei, ilia da gaga:su ba:ma:ne, ninia sia:ne gadosu amoma dabe adole ima.

⁷ Ea hadigi sogebi amogainini, Gode da amane sia:i “Na da hasalasili, Siegeme moilai amola Sagode Fago amo alalo hahamone, huluane momogili Na fi dunuma imunu.

⁸ Gilia:de fi da Na:. Ma:na:sa fi amola da Na:. Ifala:ime fi da Na dialuma figisu amola Yuda fi da Na Hina Bagade Dagulu.

⁹ Be Na da Moua:be amo Na lobo dodofesu ofodo hamomu. Amola Na da Idome amo Ni lai dagoi, amo enoga dawa:digima:ne, Na da emo salasu gisa:le, Idomema galagamu! Na da Filisidini dunu hasalasiba:le, hasalasu halasu wele sia:mu.

¹⁰ Gode! Nowa da na oule, gasa bagade gagili sali moilai bai bagade Amoga heda:ma:bela:? Nowa da na sigi aligili, Idome amoga masa:bela:?

¹¹ Di da dafawane nini higale fisiagabela:? Di da ninia dadi gagui dunu ilima gilisili mogodigili ga hame masa:bela:?

¹² Ninima ha lai dunu da nini hasalasa:besa:le, Dia nini fidima. Bai osobo bagade dunu ilia fidisu da hamedeidafa gala.

¹³ Gode da ninimagasea, ninia da ilima hasalasimu. E da ninima ha lai dunu ili hasalasimu.