Gesami Hea:su 105 - GODE EA SIA: IDA:IWANE GALA

Gode amola Ea fi Dunu

¹ Hina Godema nodone sia:ma! Ea gasa bagade hou olelema! Ea hamobe amo fifi asi gala huluanema olelema!

² Hina Godema nodone gesami hea:le ima! Amola liligi noga:idafa Ea hamobe amo adodoma.

³ Nini da Ea fi dunuba:le, hahawane nodoma. Amola dunu huluane Ema nodone sia:ne gadobe amo da hahawane nodoma:ma.

⁴ Hina Gode Ea fidima:ne lala masa, amola Ema mae yolele nodonanoma!

^5-6 Dilia da Gode Ea hawa: hamosu dunu A:ibalaha:me amola Ya:igobe, Hi ilegele lai, egaga fifi mana. Dilia da Gode Ea musa: degabo hame ba:su hou hamoi amo dawa:ma, amola se imunusa: fofada:su Ea hamoi, amo bu dawa:ma.

⁷ Hina Gode da ninia Gode. Ea hamoma:ne sia:i, E da osobo bagade fifi asi huluane ilima sia:i.

⁸ E da Ea Gousa:su sema hamoi amo eso huluane mae fisili ouligilalumu. E hamomusa: ilegei da fifi manebe 1,000 bobaligila masunu, ilima dialumu.

⁹ E da A:ibalaha:me amola Aisage elama hamomusa: ilegele sia:i, amo E da gagui dialumu.

¹⁰ Hina Gode da Ya:igobema eso huluane dialoma:ne gousa:su hamoi.

¹¹ E amane ilegele sia:i, “Na da Ga:ina:ne soge dima imunu. Amo soge da di fawane gaguli esalumu.”

¹² Gode Ea fi dunu da bagahame galu. Ilia da Ga:ina:ne soge ganodini ga fi dunu agoane ba:i.

¹³ Ilia da soge enoga enogaia udigili lafiadalu. Ilia da fifilai enoga enogaia udigili lafiadalu.

¹⁴ Be Gode da ili gaga:iba:le, eno fi da ili hame banenesi. Ili gaga:ma:ne, Gode da eno hina bagade dunu ilima amane sisane i,

¹⁵ “Na ilegei hawa: hamosu dunu, ilima mae se nabasima. Na balofede dunuma, mae digili ba:ma!”

¹⁶ Hina Gode da ilia sogega ha: iasi amola ilia ha:i manu logo hedofai dagoi.

¹⁷ Be E da dunu ea dio amo Yousefe, (e da udigili hawa: hamomusa: bidi lai) amo ili bisima:ne asunasi.

¹⁸ Ea emo da sia:inega la:gi amola ea galogoa sisiga:le, ouli gisa:gisu ba:i.

¹⁹ E da se nabawane ouesalu amogainini ea musa: ba:la:lusu liligi da dafawane doaga:i dagoi ba:i. Hina Gode Ea sia: da ea ba:la:lusu da dafawane olelei.

²⁰ Amalalu, Idibidi hina bagade (e da fifi asi gala bagohame ouligisu) ea se iasu diasu logo doasima:ne sia:i.

²¹ E da Yousefe amo Idibidi gamane ouligima:ne sia:i. E da Idibidi soge huluane, ea fawane ouligima:ne sia:i. Yousefe da eagene dunu amola hina bagade

²² Hina bagade ea sia:beba:le, Yousefe da eagene dunu amola hina bagade ea fada:i sia:su dunu huluanema ouligi galu.

²³ Amalalu, Ya:igobe da Idibidi sogega asili, ha:ini fi.

²⁴ Hina Gode da Ea fi dunuma, mano bagohame i. E da ilima ha lai dunu baligima:ne, gasa bagade Ea fi dunuma i.

²⁵ Hina Gode da hamobeba:le, Idibidi dunu da Gode Ea fi dunuma bagade higasu. Idibidi dunu da Isala:ili dunuma bagadewane ogogosu.

²⁶ Amalalu, Gode da Ea ilegei hawa: hamosu dunu Mousese amola Elane ela asunasi.

²⁷ Ela da Gode Ea gasa bagade hou amola musa: hame ba:su hou amo Idibidi soge ganodini hamoi.

²⁸ Gode da Idibidi sogega gasi iasi. Be Idibidi dunu da Ea hamoma:ne sia:i nabawane hame hamoi.

²⁹ E da ilia hano huluane maga:me a:i asili, menabo huluane bogogia:i.

³⁰ Guama da ilia soge huluane nabalesi. Hina bagade ea diasu amolawane guamaga nabalesi.

³¹ Gode da hamoma:ne sia:beba:le, gagoba: amola mimini da soge huluane ganodini bagadewane wa:le lafia:su.

³² E da gibu mae iawane, mugene amola ha:ha:na fawane ilia sogega iasi.

³³ Amoga E da ilia waini efe amola figi ifa amola ifa huluane gugunufinisi dagoi.

³⁴ E da hamoma:ne sia:beba:le, danuba: wa:i osea:i, idimu hamedeidafa, amo ilima asunasi.

³⁵ Ilia da ifalabo amola ha:i manu bugi amo huluane na dagoi.

³⁶ E da Idibidi sosogo fi magobo dunu mano huluane fane lelegei.

³⁷ Amalalu, E da Isala:ili dunu gadili oule asi. Ilia da silifa amola gouli gisawene gadili asi. Ilia huluane da dagumui amola gasa bagade ba:i.

³⁸ Idibidi dunu da iliba:le beda:i, amola ili ahoabeba:le hahawane ba:i.

³⁹ Gode da Ea fi dunuma mu mobiga dedeboi. Amola gasia hadigima:ne lalu iasi.

⁴⁰ Ilia Ema edegeiba:le, e da ilima aiyei (quail) sio i. E da Hebeneganini, ili sadima:ne, ha:i manu i.

⁴¹ E da igi da:iya fabeba:le, hano fudagala:le, musa:le sa:ili, hano bagadewane hafoga:i sogega hano yogo asi.

⁴² E da musa: Ea hawa: hamosu dunu A:ibalaha:mema hadigi ilegele sia:su, amo bu dawa:i.

⁴³ Amaiba:le, e da Ea ilegei fi dunu gadili oule asi. Amola ilia da hahawaneba:le, nodone gesami hea:i amola wele sia:i.

⁴⁴ -

⁴⁵ Ea fi dunu da Ea sema amo noga:le nabawane hamoma:ne, amola Ea hamoma:ne sia:i amo huluane noga:le fa:no bobogema:ne, E da eno dunu fi ilia soge samogene, Ea fi dunuma i. Amola Ea fi dunu da eno dunu ilia bugili nasu soge gesoama:ne, E da logo doasi. Hina Godema nodoma!