Aisaia 62 - GODE EA SIA: IDA:IWANE GALA

¹ Na da Yelusaleme fi ilia dogo denesima:ne sia:mu. Na da sia: mae ouiya:le, e gaga:i dagoi amola ea hasalasu hou da gasi ganodini gamali agoane ba:sea fawane ouiya:mu.

² Yelusaleme! Fifi asi gala dunu huluane da dia hasalasu hou ba:mu. Ilia hina bagade dunu da dia hadigi ba:mu. Hina Gode Hisu da dima dio gaheabolo asulimu.

³ Di da Hina Gode Ea habuga noga:i agoai ba:mu.

⁴ Dia dio da wali, “Fisiagai dagoi” amola Isala:ili soge dio da “Uda Fisiagai.” Be dia dio gaheabolo da “Gode da ema Hahawane Gala” ba:mu. Amola Isala:ili soge dio gaheabolo da “Uda Hahawane Lai Dagoi” ba:mu. Bai Hina Gode da dima hahawane gala, amola E da Isala:ili soge amoga egoa agoane ba:mu.

⁵ Dunu amo da di hahamoi E da ayeligi amo da a:fini dunuga hame dawa:digi lasa agoane, di lamu. Amola dunu da ea uda gaheabolo lai amoma hahawane gala, amo defele, dia Gode da dima hahawane ganumu.

⁶ Yelusaleme! Dia gagoi da:iya Na da sosodo ouligisu dunu aligima:ne sia:i. Ilia da eso amola gasi ganodini mae yolele, mae ouiya:le, Hina Gode Ea ilegele sia:i, E da mae gogolema:ne, Ema eso huluane sia:ma:ne Na da sia:i dagoi.

⁷ Ilia da Hina Godema, E da mae helefili, fifi asi gala huluane da Yelusaleme amoma bu nodoma:ne, Yelusaleme bu hahamoma:ne, Ema sia:mu da defea.

⁸ Hina Gode da amane sia:i, (amola E da Ea gasaga Ea sia:i defele hamomu) “Dilia ha lai dunu ilia da bu dilia gagoma hame manu, amola dilia waini hano hame manu.

⁹ Be dilia fawane da gagoma bugi amola faiba:le da agi ga:gi nanu, Hina Godema nodomu. Amola dilia da waini efe ouligiba:le amola waini fage faiba:le, da waini hano Na Debolo gagoi ganodini manu.

¹⁰ Yelusaleme fi dunu! Moilai gadili asili, dilia mugululi asi dunu buhagima:ne, logo fodoma. Logo hahamoma! Igi fadegama! Fifi asi gala huluane dawa:ma:ne, dawa:digisu hahamosu gaguma. Amasea ilia huluane agoane dawa:mu, amo

¹¹ Hina Gode da osobo bagade fifi asi gala huluane ilima agoane sia:sa, “Yelusaleme fi dunu ilima amane sia:ma, ‘Hina Gode da dili gaga:musa: misunu. Amola E da dunu amo E gaga:i, amo oule misunu.’”

¹² Dunu eno da dilima dio asulimu, amo “Gode Ea Hadigi Fi” amola “Fi amo Hina Gode da Gaga:i Dagoi.” Ilia da Yelusaleme amoma dio asulimu, amo, “Gode Ea Dogolegei Moilai Bai Bagade.” amola “Moilai Bai Bagade amo Gode da Hame Fisiagai.”