Aisaia 45 - GODE EA SIA: IDA:IWANE GALA

Hina Gode da Sailase hina bagade Hamoma:ne Ilegei

¹ Hina Gode da Sailase hina bagade hamoma:ne ilegei dagoi. E da Sailase amo fifi asi gala ilima hasanasima:ne ilegei dagoi. Sailase da hina bagade eno ilia gasa wadela:lesimu. Hina Gode da Sailase golili sa:ima:ne, moilai bai bagade ilia ga:su doasimu. Hina Gode da Sailasema amane sia:sa,

² “Na Nisu da dia logo fodomu. Na da goumi amola agolo mugululi, umi hamomu. Na da “balase” logo ga:su mugulumu amola ouli galiamo agoai ga:su liligi goudamu.

³ Na da liligi noga:idafa gasi agoai sogebi ganodini wamolegei, amo dima imunu. Amasea, Na da Hina Gode amo di da dawa:mu. Amola Isala:ili Godedafa da dia dio dawa:beba:le, dima wele sia:i dagoi.

⁴ Di da Na hawa: hamosu dunu amo Isala:ili (Na ilegei dunu fi) amo fidima:ne, Na da di ilegei dagoi. Di da Na hame dawa:, be eno dunu ilia da dima nodoma:ne, Na da ilegei dagoi.

⁵ Na da Hina God! Eno ‘gode’ da hame gala. Dia da Na hame dawa:, be Na da dia hawa: hamomu defele, gasa dima imunu.

⁶ Dunu huluanedafa, osobo bagade bega: asili eno bega: doaga:sa, amo huluane ilia da Na da Hina Gode amola eno ‘gode’ da hame gala amo dawa:ma:ne, Na da agoane hamomu.

⁷ Na da hadigi amola gasi hahamosa. Na da hahawane hou amola gugunufinisisu hou gaguli maha. Na, Hina Gode, da amo hou huluane hamonana.

⁸ Na da muagado mabe gibu defele hasalasu hou iasimu. Fedege agoane, osobo bagade da ea lafi dagale, amo hou da:gimu. Amasea, sogea fudagala:su defele, hahawane dogolegele ahoasu hou amola moloidafa hou da osobo bagadega dialebe ba:mu. Na, Hina Gode da amo hou misa:ne, hamomu.

Hina Gode da Osobo Bagade Hahamoi amola E da Hou Huluane Ouligisa

⁹ Laga osoboga hamoi ofodo, amo ofodo eno huluane defele da ea hahamosu dunuma sia:ga gegemu da defeala:? Laga osobo da ofodo hahamosu dunuma ea hamobe adole ba:sala:? Laga osoboga hamoi ofodo da e hahamosu dunu amoma, “Di da hahamosu hou hame dawa:!” amo sia: sia:sala:?

¹⁰ Nowa da ea ada amola ame elama, “Ali da abuliba:le na agoane hahamobela:?” Elama agoane adole ba:sala:?

¹¹ Hina Gode, Isala:ili ea Hadigi Gode da dunu ilia hobea misunu hou hahamonana, amola e da amane sia:sa, “Dilia da Na manolali ilima Na hamosu, amo da noga:i hame sia:mu da defea hame galebe. Dilia da Nama, “agoane hamoma!” sia:mu da hamedei.

¹² Na fawane da osobo bagade amo ganodini dunu fi esaloma:ne, hahamoi dagoi. Na gasaga Na da mu fadegale gai. Na da eso amola oubi amola gasumuni ouligisa.

¹³ Na Nisu da Sailasema Na hanai hamoma:ne, amola hou huluane moloma:ne, sia:i dagoi. Ea logo ahoabe huluane, Na da molomu. E da Na moilai bai bagade Yelusaleme amo bu gagumu. Amola Sailase da Na fi dunu (amo da wali udigili hawa: hamonana,) amo ilia halegale masa:ne logo doasimu. Dunu eno da amo hamoma:ne, ema bidi o hano suligili hame iasu.” Hina Gode Bagadedafa da sia:i dagoi.

¹⁴ Hina Gode da Isala:ili fi ilima amane sia:sa, “Dilia da Idibidi amola Sudane ilia gagui liligi huluane lamu. Amola Siba dunu sedade da dilia udigili hawa: hamosu dunu ba:mu. Ilia da sia:ine amoga la:gili, dilima fa:no bobogemu. Ilia da dilima beguduli, amane sia:mu, ‘Gode da dili esala - Hi fawane da Godedafa.

¹⁵ Isala:ili fi ilia Gode, ilia Gaga:su dunu, E da hou agoane hamosa. E da wamoaligisa.

¹⁶ Dunu amo da ogogosu ‘gode’ hahamobe da gogosiasu ba:mu. Dunu eno da ili higamu.

¹⁷ Be Hina God da Isala:ili dunu gaga:i dagoi. Ilia hasalasu hou da mae fisili dialalalumu. Amola ilia da gogosiasu hamedafa ba:mu.’”

¹⁸ Hina Gode da mu hahamoi. Hi fawane da Godedafa. E da osobo bagade hahamoi-E da amo mae muguluma:ne, gasawane hamoi. E da soge wadela:i hame be noga:idafa hamoi, Amola dunu da hahawane ganodini esaloma:ne, hamoi dagoi. Hi fawane da amane sia:sa, “Na da Hina Gode. Eno ‘gode’ da hamedafa.

¹⁹ Na da wamowane hame sia:i. Amola Na hanai hame wamolegei. Na da Isala:ili dunu ilia gugunufinisi soge amo ganodini Na hogomu, hame sia:i. Na da Hina Gode amola Na sia: da dafawane. Na da moloidafa hou olelesa.

Osobo Bagade Hina Gode amola Ba:bilone fi ilia Loboga Hamoi ‘gode’

²⁰ Hina Gode da amane sia:sa, “Dilia fifi asi gala huluane! Gilisima! Nowa da Ba:bilone ea dafai mae bogole esala. Dilia fofada:musa: misa! Dunu ilia da ifaga hamoi ‘gode’ liligi gaguli, mogodigili ahoa amola amo ‘gode’ liligi ilima sia:ne gadosa, amo dunu ilia asigi dawa:su da hamedeidafa.

²¹ Dilia sia: sia:musa: fofada:su diasuga misa. Dilia da Nama fofada:sea, dunu enoenoi gilisili sia: sa:ima. Nowa da musa: hemonega hobea misunu hou amo dawa:beba:le, olelebela:? Na, Ni fawane, Hina Gode Ea fi Gaga:su dunu, da amo hou ba:la:lusu.

²² Osobo bagade fifi asi gala dunu huluane! Nama sinidigima! Amasea, dilia Na Gaga:su ba:mu. Ni fawane da Godedafa, eno hame.

²³ Na ilegei sia: da dafawane, amola Na da amo afedenemu hame dawa:. Na da Na hou huluane amoga Na ilegei sia:i defele hamoma:ne sia:sa. Dunu huluanedafa da Nama misini, muguni bugili, Na mae yolesima:ne ilia da sia:mu.

²⁴ Na hamobeba:le fawane, hasalasu hou amola gasa bagade hou da ba:mu, amo ilia da sia:mu. Be huluane da Na higasea da gogosiamu.

²⁵ Na, Hina Gode, da Ya:igobe egaga fi huluane gaga:mu. Amasea, ilia da Nama nodosu imunu.”