UJobe 18 - IBhayibhili Elingcwele LesiNdebele

Impendulo KaBhilidadi

¹ Kwathi lapho uBhilidadi umShuhi waphendula wathi:

² “Koze kube nini ulokhu uphethe emlonyeni? Nakana andubana sikhulume.

³ Kungani usithatha njengezinkomo kube ingathi siyizithutha kuwe na?

⁴ Wena ozidabudabulayo ube yiziqa ngokuthukuthela kwakho, uthi sesingawudela umhlaba ngenxa yakho? Loba uthi amadwala agudlulwe ezindaweni zawo na?

⁵ Isibane somubi siyacima; ilangabi lomlilo wakhe liyaphela ukubhebha.

⁶ Ukukhanya ethenteni lakhe kuyafiphala; isibane esiseceleni kwakhe siyacima.

⁷ Izisinde zakhe zamandla ziyadeda; lamacebo akhe yiwo amlahla phansi.

⁸ Inyawo zakhe zimbeka emambuleni acine esemthandele.

⁹ Umjibila umhwiphula ngesithende; isihitshela simuthi nki.

¹⁰ Isihitshela usifihlelwe phansi; umjibila uthukuziwe endleleni yakhe.

¹¹ Uyethuka ngokwesaba inxa zonke kumlandelele langaphi aya khona.

¹² Umonakalo umlambele; incithakalo imlindele nxa esiwa.

¹³ Kudla ingxenye yesikhumba sakhe; izibulo lokufa lidla izitho zakhe.

¹⁴ Uyasuswa ekuvikelekeni kwethente lakhe aqhutshwe asiwe enkosini yokwesaba.

¹⁵ Umlilo uhlala ethenteni lakhe; isolufa evuthayo ichithachithwe emzini wakhe.

¹⁶ Impande zakhe ziyabuna ngaphansi lamagatsha akhe abune ngaphezulu.

¹⁷ Ukukhunjulwa kwakhe kuyaphela emhlabeni; kalabizo elizweni.

¹⁸ Uyasuswa ekukhanyeni aye ebumnyameni njalo axotshwe emhlabeni.

¹⁹ Kalabantwana loba isizukulwane ebantwini bakibo, kakho loyedwa owakhe lapho ake ahlala khona.

²⁰ Abantu bentshonalanga bayanengwa yisiphetho sakhe; abantu bempumalanga bayatshaqeka.

²¹ Ngempela linjalo ikhaya lomuntu omubi; yiyo indawo yalowo ongamaziyo uNkulunkulu.”