Ingoma 6 - IBhayibhili Elingcwele LesiNdebele

Abangane

¹ Sesiye ngaphi isithandwa sakho wena omuhle kulabo bonke abesifazane? Siqonde ngaphi isithandwa sakho ukuze sikudingise sona?

Umlobokazi

² Isithandwa sami sehlele ngesivandeni saso, endimeni yamaluba eziyoliso, ukuzulazula ezivandeni lokuqunta izimbali.

³ Ngingowaso isithandwa sami, laso singesami; uzithokozisa ngoba phakathi kwamaluba.

Umyeni

⁴ Umuhle, sithandwa sami, njengeThiza, uthandeka njengeJerusalema, ulesithunzi njengamabutho ephethe uphawu lwempi.

⁵ Susa amehlo akho kimi; angihubula igwebu. Inwele zakho zinjengomhlambi wembuzi zisehla eGiliyadi.

⁶ Amazinyo akho anjengomhlambi wezimvu zivela geziswa yileyo ihamba laleyo efanana layo; akula ehamba yodwa.

⁷ Izihlathi zakho ezivalwe liveli lakho zinjengezingxenye zesithelo sephomegranathi.

⁸ Kungabe kukhona amakhosikazi angamatshumi ayisithupha, labanye abafazi beceleni abangamatshumi ayisificaminwembili, lezintombi ezipheleleyo ezingelakubalwa;

⁹ kodwa ijuba lami, opheleleyo wami, wehlukene, nguye yedwa kunina, uyintandokazi yalowo owamzalayo. Izintombi zambona zathi ubusisiwe; amakhosikazi labafazi beceleni bambabaza.

Abangane

¹⁰ Ngubani lo oqhamuka njengokusa, omuhle njengenyanga, okhazimula njengelanga, olobukhosi njengezinkanyezi ziludwendwe?

Umyeni

¹¹ Ngehlela esivandeni esilezithelo ezilenkelo ngisiyabona amahlumela esigodini, ngisiyabona ingabe amavini ayesenunkula yini langabe amaphomegranathi ayeseqhakazile na.

¹² Ngisalibele nje isifiso sami sangibeka ezinqoleni zobukhosi ezabantu bakithi.

Abangane

¹³ Phenduka, phenduka, wena mShulamithi; phenduka, phenduka, ukuze sikubuke! Liyabe limbukelani umShulamithi kungathi libuka umgido kaMahanayimi?