Ingoma 2 - IBhayibhili Elingcwele LesiNdebele

Umlobokazi

¹ Ngililuba laseSharoni, imbali yasezigodini.

Umyeni

² Njengembali phakathi kwameva sinjalo isithandwa sami phakathi kwezintombi.

Umlobokazi

³ Njengesihlahla se-aphula phakathi kwezihlahla zeganga sinjalo isithandwa sami phakathi kwamajaha. Kumnandi kimi ukuhlala emthunzini waso, lezithelo zakhe ziyahlabusa kimi.

⁴ Useke wangisa endlini yedili, lophawu lwakhe kimi luthando.

⁵ Ngiqinisani ngamavini awonyisiweyo, lingivuselele ngama-aphula, ngoba sengiyathiswa luthando.

⁶ Ingalo yakhe yobunxele ngiyiqamele, kuthi ingalo yakhe yokunene ingigonile.

⁷ Madodakazi aseJerusalema, ngiyaliqonqosela ngezimpala langezimpalakazi zeganga. Lingalunyakazisi loba liluvuse uthando luze luzifunele lona.

⁸ Zwanini! Yisithandwa sami! Khangelani! Nansi siyeza, siseqa ezintabeni siqolotsha emaqaqeni.

⁹ Isithandwa sami sinjengempala loba ithole lomziki. Khangela! Nansiyana simi ngale komduli wakwethu, sikhangele sibona emawindini, silunguza ngezimbotshana.

¹⁰ Isithandwa sami sakhuluma sathi kimi, “Sukuma, sithandwa sami, wena omuhle, woza sihambe.

¹¹ Khangela! Ubusika sebudlulile; isikhathi sezulu sesidlule.

¹² Amaluba asebonakala emangweni; isikhathi sokuhlabelela kwezinyoni sesifikile, ukukhala kwamajuba sekuzwakala elizweni lakithi.

¹³ Umkhiwa usuthela izithelo zawo zakuqala; amavini aqhakazayo aseletha iphunga elimnandi. Sukuma, woza sithandwa sami; wena omuhle wami, woza sihambe.”

Umyeni

¹⁴ Juba lami elisezingoxweni zedwala, ekusithekeni kwamawa entaba, akungitshengise ubuso bakho, akungizwise ilizwi lakho; ngoba limnandi ilizwi lakho, lobuso bakho buyabukeka.

¹⁵ Sibambeleni amakhanka, amakhanka amancinyane onayo ezivinini, izivini zethu esezithela.

Umlobokazi

¹⁶ Isithandwa sami ngesami lami ngingowakhe; uzithokozisa ngoba phakathi kwamaluba.

¹⁷ Akuze kube emadabukakusa lapho kunyamalala khona izithunzi, phenduka sithandwa sami, ube njengempala loba njengegogo elisengumntwana phezu kwezintaba ezilamakhelekethe.