AmaHubo 95 - IBhayibhili Elingcwele LesiNdebele

Ihubo 95

¹ Wozani sihlabelele ngentokozo kuThixo; kasihlokomeni kamnandi kulo iDwala lokusindiswa kwethu.

² Kasizeni phambi kwakhe ngokubonga simdumise ngamachacho langengoma.

³ Ngoba uThixo unguNkulunkulu omkhulu, iNkosi enkulu ngaphezu kwabonkulunkulu bonke.

⁴ Inziki zomhlaba zisezandleni zakhe, leziqongo zezintaba ngezakhe.

⁵ Ngolwakhe ulwandle ngoba walwenza, lezandla zakhe zawenza umhlaba owomileyo.

⁶ Wozani, kasikhothame simkhonze, kasiguqe phambi kukaThixo uMenzi wethu;

⁷ ngoba unguNkulunkulu wethu, thina singabantu bedlelo lakhe, umhlambi awunakekelayo. Lamhla, nxa lisizwa ilizwi lakhe,

⁸ lingazenzi lukhuni inhliziyo zenu njengoba lenzenjalo eMeribha, njengelakwenza ngaleliyana ilanga eMasa enkangala,

⁹ lapho okhokho benu abangilinga khona bengizama, lanxa babekubonile engakwenzayo.

¹⁰ Okweminyaka engamatshumi amane ngangisizondele lesosizukulwane; ngathi, “Bangabantu onhliziyo zabo ziyahlanhlatha, njalo kabazazanga izindlela zami.”

¹¹ Ngakho ngamemezela ngesifungo ekuthukutheleni kwami ngathi, “Kabayikungena ekuphumuleni kwami.”