AmaHubo 92 - IBhayibhili Elingcwele LesiNdebele

Ihubo 92

Ihubo. Ingoma. Elosuku lweSabatha.

¹ Kuhle ukudumisa uThixo lokuhlabelela ebizweni lakho, wena oPhezukonke,

² ukumemezela uthando lwakho ekuseni lokuthembeka kwakho ebusuku,

³ ukutshaya iziginci ngomhubhe wezintambo ezilitshumi lemvungamo emnandi yechacho.

⁴ Ngoba uyangijabulisa ngezenzo zakho, Oh Thixo; ngihlala ngentokozo ngomsebenzi wezandla zakho.

⁵ Mikhulu kangaka imisebenzi yakho, Oh Thixo, izikile imicabango yakho!

⁶ Umuntu ongelangqondo akazi, iziwula kazizwisisi,

⁷ ukuthi loba ababi bemila njengotshani lezigangi zonke ziphumelela, zizabhujiswa nini lanini.

⁸ Kodwa wena Thixo, uphakeme laphakade.

⁹ Ngoba ngempela izitha zakho, Oh Thixo, ngempela izitha zakho zizabhubha; zonke izigangi zizachithizwa.

¹⁰ Uluphakamisile uphondo lwami njengolwenyathi; ngagcotshwa ngamakha amnandi.

¹¹ Amehlo ami abonile ukwehlulwa kwezitha zami; indlebe zami zizwile ngokuchithizwa kwezitha zami ezimbi.

¹² Abalungileyo bazaqhela njengesihlahla selala, bazakhula njengomsedari waseLebhanoni;

¹³ ngoba behlanyelwe endlini kaThixo, bazaqhela emagumeni kaNkulunkulu wethu.

¹⁴ Bazabe belokhu bethela izithelo lanxa sebebadala, bazahlala belokhu behluma beluhlaza,

¹⁵ bememezela besithi, “UThixo uqotho; uliDwala lami, kakukho bubi kuye.”