AmaHubo 91 - IBhayibhili Elingcwele LesiNdebele

Ihubo 91

¹ Lowo ohlala ekusithekeni koPhezukonke uzaphumula emthunzini kaSomandla.

² Ngizakuthi kuThixo, “Uyisiphephelo sami lenqaba yami, uNkulunkulu wami, engithemba kuye.”

³ Ngempela uzakuphephisa emjibileni womthiyi lasesifeni esibi esibulalayo.

⁴ Uzakusibekela ngezinsiba zakhe, uzuze isiphephelo ngaphansi kwamaphiko akhe; ukuthembeka kwakhe kuzakuba yisihlangu sakho lenqaba yakho.

⁵ Awuyikwesaba umnyama wobusuku, loba umtshoko ontweza emini,

⁶ kumbe ingozi ehahabela emnyameni, kumbe umkhuhlane obhubhisayo emini enkulu.

⁷ Abazinkulungwane bangawa eceleni lakho; itshumi lezinkulungwane esandleni sakho sokunene, kodwa kakusoze kusondele kuwe.

⁸ Uzaphosa nje amehlo akho ubukele ubone ukujeziswa kwababi.

⁹ Ungenza oPhezukonke abe likhaya lakho yena uThixo oyisiphephelo sami

¹⁰ lapho-ke akulangozi engakuwela, akulamonakalo ozasondela ethenteni lakho.

¹¹ Ngoba uzayala izingilosi zakhe ngawe zikulinde kuzozonke izindlela zakho;

¹² zizakuphakamisa ezandleni zazo, ukuze ungakhubeki elitsheni.

¹³ Uzanyathela isilwane lephimpi; uzasigxoba isilwane esikhulu lenyoka.

¹⁴ “Ngoba uyangithanda,” kutsho uThixo, “ngizamkhulula; ngizamvikela, ngoba uyalinaka ibizo lami.

¹⁵ Uzangibiza, ngimphendule; ngizakuba laye ekuhluphekeni, ngizamkhulula ngimenzele udumo.

¹⁶ Ngizamsuthisa ngempilo ende ngimtshengise insindiso yami.”