AmaHubo 76 - IBhayibhili Elingcwele LesiNdebele

Ihubo 76

Kumqondisi wokuhlabela. Kusetshenziswa iziginci. Ihubo lika-Asafi. Ingoma.

¹ Uyaziwa uNkulunkulu koJuda ibizo lakhe likhulu ko-Israyeli.

² Ithente lakhe liseSalema, indawo yakhe yokuhlala iseZiyoni.

³ Khonapho wayephula imitshoko ebenyezelayo, izihlangu lezinkemba, izikhali zempi.

⁴ Uyakhazimula ngokukhanya, ulobukhosi obudlula izintaba ezigcwele izinyamazana.

⁵ Amadoda alezibindi alele ucaca aphangiwe, alele ubuthongo bawo bokucina; kakho loyedwa wamabutho lawo ongaphakamisa izandla zakhe.

⁶ Uthi ungakhwaza wena, Oh Nkulunkulu kaJakhobe, ibhiza lenqola kuhle kulale phansi kuthi zwi.

⁷ Wena wedwa uyesatshwa. Ngubani ongema phambi kwakho nxa usuthukuthele?

⁸ Wathi usezulwini wehlisa ukwahlulela kwakho, ilizwe lesaba lathula,

⁹ lapho wena, Oh Nkulunkulu, waphakama ukwahlulela, ukusindisa bonke abahluphekayo belizwe.

¹⁰ Ngempela ulaka lwakho ebantwini lukulethela indumiso, kuthi bonke abasilileyo elakeni lwakho bathotshiswe.

¹¹ Yenzani izifungo kuThixo uNkulunkulu wenu lizigcwalise; akuthi wonke amazwe abomakhelwana alethe izipho kuye Yedwa omele esatshwe.

¹² Uyephula ubuqholo bababusi; uyesatshwa ngamakhosi omhlaba.