AmaHubo 56 - IBhayibhili Elingcwele LesiNdebele

Ihubo 56

Kumqondisi wokuhlabela. Kulandelwa itshuni ethi, “Ijuba phezu kwemikusu ekude.” ElikaDavida. Imikithamu . Lapho wayesethunjwe ngamafilistiya eGathi.

¹ Woba lomusa kimi, Oh Nkulunkulu, ngoba abantu baxotshana lami kubi; ilanga lonke bayajujumezela bengihlasela.

² Labo abangigconayo baxotshana lami ilanga lonke; abanengi bangihlasela bekloloda.

³ Nxa ngisesaba ngizathemba kuwe.

⁴ KuNkulunkulu, engidumisa ibizo lakhe, ngithemba kuye uNkulunkulu; angiyikwesaba. Umuntu wenyama angenzani kimi?

⁵ Ilanga lonke batshona behlanekela amazwi ami; beqoqa ukungibhidliza.

⁶ Bayabuthana bengicathamela balandele izinyathelo zami betshisekela ukucitsha impilo yami.

⁷ Loba sekutheni ungabayekeli baphunyuke; ngokuthukuthela kwakho, Nkulunkulu, zidilize izizwe.

⁸ Bhala phansi isililo sami; bhala ithonsi ngalinye lezinyembezi zami emqulwini wakho kazikho yini emibhalweni yakho?

⁹ Lapho-ke izitha zami zizafulathela nxa sengicela uncedo. Ngalokhu ngizakwazi ukuthi uNkulunkulu ulami.

¹⁰ KuNkulunkulu, engidumisa ibizo lakhe, kuThixo engidumisa ibizo lakhe,

¹¹ kuNkulunkulu ngiyathemba; angiyikwesaba. Umuntu angenzani kimi na?

¹² Ngibanjwe yizifungo kuwe, Oh Nkulunkulu; ngizakwethula umnikelo wami wokubonga kuwe.

¹³ Ngoba ungikhulule ekufeni lezinyawo zami lapho ngikhubeka, ukuze ngihambe phambi kukaNkulunkulu ekukhanyeni kwempilo.