AmaHubo 36 - IBhayibhili Elingcwele LesiNdebele

Ihubo 36

Kumqondisi wokuhlabela. ElikaDavida inceku kaThixo .

¹ Ngilenkinga enhliziyweni yami mayelana lokuxhwala kwesigangi: Kakukho ukwesaba uNkulunkulu engqondweni yaso.

² Phela kweyaso ingqondo siyazikhohlisa size sehluleke ukubona kumbe ukuzonda isono saso.

³ Amazwi omlomo waso abolile alenkohliso; kasiselakho ukuhlakanipha lokulunga.

⁴ Kwala loba silele siceba ububi; sizinikela endleleni yobubi njalo kasikulahli okubi.

⁵ Uthando Lwakho, Thixo, lufika emazulwini, ukuthembeka Kwakho esibhakabhakeni.

⁶ Ukulunga Kwakho kunjengezintaba ezesabekayo, ukwahlulela kuhle Kwakho njengolwandle olukhulu. Oh Thixo, uyamlondoloza umuntu kanye lenyamazana.

⁷ Luligugu elinganani uthando Lwakho olungaphuthiyo, Oh Nkulunkulu! Bonke abantu bazuza isiphephelo emthunzini wamaphiko Akho.

⁸ Bayazitika ngokudla okunengi endlini Yakho; ubapha okunathwayo okwemfuleni wakho wokuthokoza.

⁹ Ngoba kuwe kulomthombo wokuphila; kokwakho ukukhanya sibona ukukhanya.

¹⁰ Qhubeka ngothando Lwakho kulabo abakwaziyo, ukuluga Kwakho kwabaqotho enhliziyweni.

¹¹ Sengathi unyawo lwabazazisayo lungehluleka ukunginyathela, loba ukuthi isandla sababi singangixotshi.

¹² Bonani-ke ukuthi izigangi sezithe daca ziwiselwe phansi, kazisavuki futhi!