AmaHubo 24 - IBhayibhili Elingcwele LesiNdebele

Ihubo 24

Ihubo likaDavida.

¹ Umhlaba ngokaThixo, lakho konke okukuwo, ilizwe labo bonke abahlala kulo;

² ngoba wenza isisekelo sawo phezu kolwandle wawumisa phezu kwamanzi.

³ Ngubani ongaqansa intaba kaThixo na? Ngubani ongema endaweni yakhe engcwele na?

⁴ Ngulowo olezandla ezihlanzekileyo lenhliziyo emhlophe, ongaphakamiseli umphefumulo wakhe kunkulunkulu wamanga loba afunge ngenkohliso.

⁵ Uzakwamukela isibusiso kuThixo lokukhululwa kuNkulunkulu uMsindisi wakhe.

⁶ Sinjalo isizukulwane salabo abamdingayo, abadinga ubuso Bakho, Oh Nkulunkulu kaJakhobe.

⁷ Phakamisani amakhanda enu, lina masango; phakamani, lina minyango yekadeni, ukuba iNkosi yenkazimulo ingene.

⁸ Ngubani iNkosi yenkazimulo? NguThixo oqinileyo olamandla, uThixo olamandla empini.

⁹ Phakamisani amakhanda enu, lina masango; aphakamiseni, lina minyango yekadeni, ukuba iNkosi yenkazimulo ingene.

¹⁰ Ungubani na lowo Thixo wenkazimulo? NguThixo uSomandla iNkosi yenkazimulo.