AmaHubo 146 - IBhayibhili Elingcwele LesiNdebele

Ihubo 146

¹ Dumisani uThixo. Dumisa uThixo mphefumulo wami.

² Ngizamdumisa uThixo impilo yami yonke; ngizahlabela indumiso kuNkulunkulu wami nxa ngisaphila.

³ Lingabeki ithemba lenu emakhosini, ebantwini benyama, abangeke basindise.

⁴ Kuthi umoya wabo ungaphuma, babuyele emhlabathini; mhlalokho nje amacebo ahle abhidlike.

⁵ Ubusisiwe lowo osizo lwakhe lunguNkulunkulu kaJakhobe, othemba lakhe likuThixo uNkulunkulu wakhe.

⁶ UnguMenzi wamazulu lomhlaba, ulwandle lakho konke okulapho: uThixo owala elokhu ethembekile laphakade.

⁷ Uyabalwela abancindezelwayo anike abalambileyo ukudla. UThixo ukhulula izibotshwa,

⁸ uThixo wenza iziphofu zibone, uThixo uyabaphakamisa labo asebebhazalele, uThixo uthanda abalungileyo.

⁹ UThixo uyabalinda abezizweni asekele izintandane labafelokazi, kodwa anyampise izindlela zababi.

¹⁰ UThixo uyabusa nini lanini, uNkulunkulu wakho, wena Ziyoni, ezizukulwaneni zonke. Dumisani uThixo.