AmaHubo 140 - IBhayibhili Elingcwele LesiNdebele

Ihubo 140

Kumqondisi wokuhlabela. Ihubo LikaDavida.

¹ Ngilamulela, Oh Thixo, ebantwini ababi; ngivikela ebantwini bodlakela,

² abakha amacebo amabi ezinhliziyweni zabo bahlokomise impi ukusa kwamalanga.

³ Benza izindimi zabo zicije njengezenyoka; ubuhlungu benhlangwana busezindebeni zabo.

⁴ Ngivikela, Oh Thixo, ezandleni zababi; ngiphephisa ebantwini bodlakela abaceba ukungigwenxa.

⁵ Abantu abazigqajayo bangifihlele isifu; sebewanwebile amambule abo bangithiya lapha lalapha endleleni yami.

⁶ Oh Thixo, ngithi kuwe, “UnguNkulunkulu wami.” Zwana, ukukhala kwami ngicela umusa.

⁷ Oh Thixo wobukhosi, mhlengi wami olamandla, ovikela ikhanda lami ngelanga lempi

⁸ ungavumeli ababi izifiso zabo Oh Thixo; ungayekeli amacebo abo ukuthi aphumelele, funa bazigqaje.

⁹ Akuthi ingqondo zalabo abangihanqileyo zandelwe luhlupho oludalwe yizindebe zabo.

¹⁰ Akuthi amalahle avuthayo abakhithikele; sengathi bangaphoselwa emlilweni, emigodini ebhixa udaka, bangavuki futhi.

¹¹ Akuthi abahlebayo bangatholi indawo elizweni; akuthi umnyama ubahlale izithende abantu bochuku.

¹² Ngiyazi ukuthi uThixo ubenzela okulungileyo abayanga, ubamele abaswelayo.

¹³ Ngempela abalungileyo bazalidumisa ibizo lakho labaqotho bazahlala phambi kwakho.