AmaHubo 122 - IBhayibhili Elingcwele LesiNdebele

Ihubo 122

Ingoma yemiqanso. ElikaDavida.

¹ Ngathokoza lalabo abathi kimi, “Kasiye endlini kaThixo.”

² Inyawo zethu zimi ngaphakathi kwamasango akho, wena Jerusalema.

³ IJerusalema yakhiwe njengomuzi obambeneyo waqina.

⁴ Kulapho eziqansela khona izizwana, izizwana zikaThixo, ukudumisa ibizo likaThixo njengalokho okwamiselwa u-Israyeli, ukuba abonge ibizo likaThixo.

⁵ Kulapho okumi khona izihlalo zobukhosi ezokwahlulela, izihlalo zobukhosi ezendlu kaDavida.

⁶ Khulekelani ukuthula kwaseJerusalema: “Sengathi labo abakuthandayo bangaphepha.

⁷ Sengathi kungaba lokuthula ngaphakathi kwemiduli yakho lokuvikela ngaphakathi kwezinqaba zakho.”

⁸ Ngenxa yabafowethu labangane bami, ngizakuthi, “Ukuthula akube ngaphakathi kwakho.”

⁹ Ngenxa yendlu kaThixo uNkulunkulu wethu, ngizakhuthaza ukuphumelela kwakho.