AmaHubo 118 - IBhayibhili Elingcwele LesiNdebele

Ihubo 118

¹ Mbongeni uThixo ngoba ulungile; uthando lwakhe lumi laphakade.

² U-Israyeli katsho athi: “Uthando lwakhe lumi laphakade.”

³ Kayithi indlu ka-Aroni: “Uthando lwakhe lumi laphakade.”

⁴ Akuthi bonke abamesabayo uThixo bathi: “Uthando lwakhe lumi laphakade.”

⁵ Ngathi ngidabukile ngakhala kuThixo, waphendula ngokungikhulula.

⁶ UThixo ulami, angiyikwesaba. Umuntu angenzani kimi na?

⁷ UThixo ulami; ungumsizi wami. Ngizazinyonkoloza ngegunya izitha zami.

⁸ Kungcono ukuphephela kuThixo kulokuthemba umuntu.

⁹ Kungcono ukuphephela kuThixo kulokuthemba amakhosana.

¹⁰ Zonke izizwe zangihanqa, kodwa ngegama likaThixo ngazichitha.

¹¹ Zangihanqa inxa zonke kodwa ngegama likaThixo ngazichitha.

¹² Zangiminyezela njengezinyosi kodwa zafa masinyane njengokungunguma komlilo wameva; ngebizo likaThixo ngazichitha.

¹³ Ngasunduzelwa emuva ngaphose ngawa, kodwa uThixo wangisiza.

¹⁴ UThixo ungamandla ami lengoma yami; yena useyikusindiswa kwami.

¹⁵ Imisindo yentokozo lokunqoba iphuma emathenteni abalungileyo: “Isandla sokunene sikaThixo senzile izinto ezinkulu!

¹⁶ Isandla sokunene sikaThixo siphakanyisiwe kakhulu; isandla sokunene sikaThixo senzile izinto ezinkulu!”

¹⁷ Angizukufa kodwa ngizaphila, ngizamemezela lokho akwenzileyo uThixo.

¹⁸ UThixo ungitshayile kakhulu, kodwa kanginikelanga ekufeni.

¹⁹ Ngivulela amasango okulunga; ngizangena ngimbonge uThixo.

²⁰ Nanti isango likaThixo okungangena khona abalungileyo.

²¹ Ngizakubonga, ngoba ungiphendulile; usuyinsindiso yami.

²² Ilitshe ababelilahlile seliyilona ilitshe lekhoneni;

²³ uThixo ukwenzile lokhu; njalo kuyamangalisa emehlweni ethu.

²⁴ Leli lilanga alenzileyo uThixo; kasithokoze sijabule ngalo.

²⁵ Oh Thixo, sisindise; Oh Thixo, siphumelelise.

²⁶ Ubusisiwe lowo obuya ngebizo likaThixo. Siyakubusisa sisendlini kaThixo.

²⁷ UThixo unguNkulunkulu, wenzile ukukhanya kwakhe kwehlela phezu kwethu. Liphethe izingatshana, ngenani edibini lomgido lize liyefika empondweni ze-alithare.

²⁸ UnguNkulunkulu wami, ngizakubonga; unguNkulunkulu wami, ngizakuphakamisa.

²⁹ Mbongeni uThixo ngoba ulungile; uthando lwakhe lumi kuze kube phakade.