AmaHubo 112 - IBhayibhili Elingcwele LesiNdebele

Ihubo 112

¹ Dumisani uThixo. Ubusisiwe umuntu owesaba uThixo, othokoza kakhulu ngemilayo yakhe.

² Abantwabakhe bazaba lamandla elizweni; isizukulwane soqotho sizabusiswa.

³ Inotho lenzuzo kusendlini yakhe, lokulunga kwakhe kumi laphakade.

⁴ Lasebumnyameni kuyavela ukukhanya kwabaqotho, emuntwini olomusa, olesihawu lolungileyo.

⁵ Ubuhle buzakwehlela kuye ophanayo loweboleka ekhululekile, oqhuba zonke izinto zakhe ngemfanelo.

⁶ Ngeqiniso kayikunyikinyeka; umuntu olungileyo uzakhunjulwa lanininini.

⁷ Akayikwesaba imibiko emibi; inhliziyo yakhe ichumile, yethembele kuThixo.

⁸ Inhliziyo yakhe ikhululekile, akalakwesaba; ekucineni uzakhangela izitha zakhe ngokunqoba.

⁹ Uhlakazele izipho zakhe kubayanga ezindaweni zonke, ukulunga kwakhe kumi laphakade; uphondo lwakhe luzaphakanyiselwa phezulu ngenhlonipho.

¹⁰ Umuntu omubi uzakubona lokhu afuthelane, uzagedla amazinyo akhe, acikizeke emzimbeni; izinkanuko zababi zizaphetha ziyize.