AmaHubo 1 - IBhayibhili Elingcwele LesiNdebele

Ugwalo 1 AmaHubo 1 – 41 Ihubo 1

¹ Ubusisiwe umuntu ongahambi ngezeluleko zababi; ongemiyo endleleni yezoni; ongahlaliyo esihlalweni sabaklolodayo.

² Kodwa ukuthokoza kwakhe kusemthethweni kaThixo, futhi unakana ngomthetho wakhe imini lobusuku.

³ Unjengesihlahla esihlanyelwe emifuleni yamanzi, esithela izithelo zaso ngesikhathi saso, ohlamvu laso kalibuni. Konke akwenzayo kuyaphumelela.

⁴ Ababi kabanjalo! Banjengamakhoba aphetshulwa ngumoya.

⁵ Ngakho ababi kabayikuma ekwahlulelweni, noma izoni enkundleni yabalungileyo.

⁶ Ngoba uThixo uyayilinda indlela yabalungileyo, kodwa indlela yababi iya ekubhujisweni.