Zhozəwɛ 4 - Ghena ta Shala

Yɛ pelɛ kezha zəzə jive te hələ

¹ Ma kwa jivenji mbeli pɛtɛ te hələa Zhəwrdɛŋe ne, ma ke Mahwətə sha Zhozəwɛ:

² «Ntave mbeli meŋe bakeghəmbe, wəndə kwetɛŋe mbe yita.

³ Gezave nda ke hɛ kezha nta pelɛ meŋe bakeghəmbe same kwa Zhəwrdɛŋe, te ŋkwa nya se nya seɗa ta ka dzeghe Shala. Kateslə mbelia shɛhɛ le pelɛa shɛhɛ ba'a katebete hɛ hɛ te ŋkwa nya tehɛ hɛ.»

⁴ Pa Zhozəwɛ hekakɛ zhili meŋe bakeghəmbe hwa ka Israyɛl nyi tsehave ŋkɛ, wəndə kwetɛŋe mbe yayata yita.

⁵ Ma ke Zhozəwɛ sha hɛ: «Dzete mə te kema ta səndəkwəa Mahwətə Shala ta ŋayɛ ba'a kwiɗi mə kwa tepe ta Zhəwrdɛŋe, kelete pelɛ yayata wəndəa ŋayɛ te bazla ta ŋkɛ kala nza ta hwelefe ta ka Israyɛl.

⁶ Pelɛa shɛhɛ ka tezəzə ŋayɛ wəsə nya kemenete geva teke. Ma ke'yɛwe wəsə nya ɗe hɛ kancɛ kezha gheyɛ ŋwalea ŋayɛ va gheyɛ te kwete hɛ ne,

⁷ ma pe yɛ sha tezhɛne nda ke hɛ: Yɛməa Zhəwrdɛŋe slamte geva mbe kwa kema ta səndəkwəa jikə geva ta Mahwətə kwa nza hɛ kajive te hələa shɛ, pelɛ nyi ka zəzə nda wəsəa shɛ ke ka Israyɛl kaghala ghala.»

⁸ Pa ka Israyɛl menete wəsə nya gezete nda Zhozəwɛ ke hɛ. Pa hɛ ntave pelɛ meŋe bakeghəmbe kala nya gezete nda Mahwətə ke Zhozəwɛ kala kwelea ka Israyɛl, pa hɛ keleghe kadzembe ghedəkwə ba'a beteyi hɛ mbe.

⁹ Pa Zhozəwɛ pate kweci pelɛ meŋe bakeghəmbe te tepe ta Zhəwrdɛŋe, te ŋkwa nya se seɗa ta ka dzeghe Shala nyi kekele səndəkwəa jikə geva, mba hɛ kwagha pa ɓeshi.

¹⁰ Mba ka dzeghe Shala nyi kekele səndəkwə meghereŋe kwagha, nda menete geva pɛtɛa wəshi nyi gezete nda Mahwətə ke Zhozəwɛ kezha geze nda ke mbeli kala nya gezete nda Moyize ke Zhozəwɛ, nda ntsə geva mbeli kajive te hələ.

¹¹ Ma kwa jivenji mbeli pɛtɛ ne, pa səndəkwəa Mahwətə ba'a ka dzeghe Shala dzete kema ta mbeli.

¹² Pa hwelefefia Rəbɛn, ŋa Gad ba'a kwete bela ta hwelefefia Manasɛ jivenji te kema ta kweci ka Israyɛl, nyi kehite geva yitea mpa kala nya gezete Moyize.

¹³ Gare slibə wəfaɗemsə mbeli nyi kehite geva yitea mpa nyi kedzete kema ta Mahwətə laka ŋwela ta Zhɛriko.

¹⁴ Te vecia shɛ ne, nahe Mahwətə keveyi Zhozəwɛ kawəndə nya wəba kwa kema ta ka Israyɛl, kahawe hɛ ve kala nya se hɛ kahawe va Moyize pa te kwa keɗaŋe ta mpia ŋkɛ.

¹⁵ Ma ke Mahwətə sha Zhozəwɛ:

¹⁶ «Geze nda ke ka dzeghe Shala nyi kekele səndəkwə nya nza palepa ta jikə geva kwa kasame kwa Zhəwrdɛŋe.»

¹⁷ Ma ke Zhozəwɛ gezave nda ke ka dzeghe Shala: «Same mə kwa Zhəwrdɛŋe.»

¹⁸ Ma vəa ŋkwa nya same ka dzeghe Shala nyi kekele səndəkwəa jikə geva ta Mahwətə kwa Zhəwrdɛŋe, nya ŋkeɗeve hɛɗi nya keghwele ghwele seɗa ta nci ne, pa yɛməa Zhəwrdɛŋe zhɛneyi geva te ŋkwa ŋkɛ, ntake ŋkɛ kahwɛ ba'a kadzeme te yɛ hələbə kala nya vəashi.

¹⁹ Te kwa meŋe ta hɛ mbe tere kwa ghate same mbeli kwa Zhəwrdɛŋe, pa hɛ menete ghedəkwə mbe Gilgal laka ŋkwa nya kesame ta veci yitea Zhɛriko.

²⁰ Ma pelɛ nyi ntave nyi hɛ meŋe bakeghəmbe kwa Zhəwrdɛŋe ne, pa Zhozəwɛ pate hɛ mbe Gilgal.

²¹ Kwa sebe ta ŋkɛ, ma ke sha ka Israyɛl: «Ma ke'yɛwe te'yɛwe wəsə nya ɗe pelɛ nyi kancɛ ŋwalea ŋayɛ va gheyɛ ne,

²² kateɓela nda yɛ ke hɛ tsema tsema shavenji ka Israyɛl te Zhəwrdɛŋe nya keghwele ghwele.

²³ Kwa nza ŋkɛ nahe Shala Mahwətə ta ŋayɛ keghwelemte hələa Zhəwrdɛŋe kezha jive yɛ te, kala nya menete Shala Mahwətə ta ŋayɛ le ndərəa Ghwəvərə nya ghwelemte ŋkɛ kwa kema ta n'yɛ kezha jive n'yɛ ghen'yɛ te.

²⁴ Ma nda menete ŋkɛ tsagha ne, kezha ɗepete mbeli nyi te hɛɗi nahe dzeve ta Mahwətə kenza bereteke, kezha hawe yɛ va Shala Mahwətə ta ŋayɛ kaghala ghala.»