Zhozəwɛ 2 - Ghena ta Shala

Zhozəwɛ kaghwene ka newe ŋkwa kadzembe Zhɛriko

¹ Se mbe ghedəkwə nya kwa Shitim ne, pa Zhozəwɛ, wəzege ta Nəwn, ghwenakɛ mbeli bake kezha newemte nza ta hɛɗi ba'a meleme ta Zhɛriko. Ma kwa ntsehe hɛ mbe Zhɛriko ne, pa mbeli nyi bake shɛhɛ lə ba'a hɛnji ki ghɛa kwete male mefətekwə nya nza sləa nta kaRahab.

² Pa meghe fate nahe ka Israyɛl kese heviɗia shɛ kadzembe meleme, kezha newemte zeweve yitea hɛɗi.

³ Tagha gɛ, pa meghea ka Zhɛriko ghwenakɛ mbeli sha Rahab, ma ke hɛ shɛ: «Fəakave mbeli nyi kedzeki ghɛa ŋa nyi, kwa nza ŋkɛ kezha newe zeweve ta hɛɗi se hɛ.»

⁴ Ama pa malea shɛ fəte zhili nyi bakea shɛhɛ ba'a ntikəakɛ hɛ, ma ke: «Kaganda ne, nahe mbelia shɛhɛ kese ki ghɛa ɗa, ama keɗepe ŋkwa nya se hɛ te 'ya we

⁵ Ma kwa mene viɗi, te və nya teŋzle degha mbeli ne, pa hɛ shavenji, keɗepe ŋkwa nya lə hɛ te 'ya we. Təkwə təkwəte mə hɛ kahe kahe, katekekave hɛ yɛ.»

⁶ Ama kadzeme dɛɓere nya kənəa ghɛa nta fəghe hɛ nde. Pa nde ntikəyi hɛ mbe sheghwəa pawa nyi ketseɓa tseɓa pelɛagha.

⁷ Cape mbeli nyi kekeka hɛ kwa hweŋkwa hwa'a kwa hələa Zhəwrdɛŋe kazele hɛ, pa mbeli ŋzlemte degha mbeli kwa sebe ta ka zele ŋkwa.

⁸ Ma nda teɓelahe ka newe ŋkwa nyighɛ ne, pa nde dzeme sha hɛ pelɛ dɛɓere nya kənəa cɛ.

⁹ Ma ke sha mbelia shɛhɛ: «Nahe 'ya keɗepe nahe Mahwətə kendeke ŋayɛ hɛɗi nya, nahe ghazlənə va gheyɛ kekeseve ŋkwa kwele kwele, pɛtɛ helia mbeli nyi te hɛɗi nya kesla sla.

¹⁰ Nahe ghen'yɛ kefate hələa Ghwəvərə nya ghwelemte Mahwətə kwa kema ta ŋayɛ kwa shave yɛ mbe Ɛzhipte ba'a tsema tsema menete yɛ le ka meghea ka Amor, yɛ Sihon le Og, pelɛ kema ta hələa Zhəwrdɛŋe, nahe yɛ kezamte sebe te wəshia nci.

¹¹ Ma kwa fate ghena shɛhɛ ghen'yɛ ne, nahe mehele ta n'yɛ ketazenyɛ va ghazlənə. Wəndə shɛ kezhɛne kapesle yitea ghereŋe kwa kema ta ŋayɛ we. Kwa nza ŋkɛ nahe Shala Mahwətə ta ŋayɛ kenza kaShala nya pelɛ ghweme ba'a nya kwake te hɛɗi.

¹² Ma tsetsenya gɛ, zemete ɗa mə fela laka Mahwətə: kala nya menete ŋayɛ ganyɛ 'ya ne, katemene ɗa ganyɛ yɛ ke mbelia ɗa perə. Ncɛte ɗa mə wəsə nya kenza kancɛte ɗa kenza nde kaganda ghena ta ŋayɛ.

¹³ Meɗeyi ɗa kezha sərə mpia yiteyɛ ɗa, meyɛ ɗa, ka kesaka meyɛ ɗa, ŋwalea kwɛa meyɛ ɗa ba'a wəshia nci pɛtɛ. Katembele mpia n'yɛ yɛ va mte.»

¹⁴ Ma ke mbelia shɛhɛ: «Mpia n'yɛ ya te ŋkwa mpia ŋayɛ keɗema yɛ kencɛte ghena nya tsahwe nya gheɓəmə kwelɛ ghəa ɓəmə. Ma kendeke n'yɛ hɛɗi nya Mahwətə ne, katenza ghen'yɛ tiɗiɗi laka gha ba'a katemene ŋa ganyɛ ghen'yɛ.»

¹⁵ Pa nde fəakawa hɛ le zewe sawa te wəfela ta cɛ, kwa nza ŋkɛ dzeme vare zlia meleme ŋate ghɛa nta mbeli.

¹⁶ Ma ke sha hɛ: «Dzeme ŋayɛ mə kawəfərə pelɛ ghweme yagha mbeli nyi kezele ŋayɛ kabegeme le gheyɛ. Nza ŋayɛ mə kahɛ mahekene pelɛagha, nda tezhɛneke geva mbeli nyi kezele ŋayɛ kase, ma kwa sebe ta ŋkɛ ne, kateslə yɛ yitea dzeghwa ta ŋayɛ.»

¹⁷ Ma ke zhilia shɛhɛ shɛ: «Wa nya tsetse tembele ghəa n'yɛ ghen'yɛ va fela nya geze n'yɛ na kazeme:

¹⁸ Ma kese ghen'yɛ kadzete hɛɗi nya, katehwepe zewe kwa ghɛmɛ na mɛa wəfela nya kelakawa n'yɛ na te, katetsene yiteyɛ ŋa, meyɛ ŋa, ka kesaka meyɛ ŋa ba'a mbelia nci ki ghɛa ŋa na,

¹⁹ yayata wəndə nya kezlakemte degha ta ŋa kashave ne, kənəa ghəa ŋkɛ mimia ŋkɛ, kenza kənəa ghen'yɛ we. Ama kekwaɗakɛ mbeli nyi nza yɛ le hɛ ki ghɛa ŋa wəndə ne, kənəa ghen'yɛ mimia ŋkɛ.

²⁰ Ma kencɛte ghena nya gezete ŋa ghen'yɛ na ne, mba ghena shɛ kakese n'yɛ we.»

²¹ Ma ke: «Kala nya meɗeyi nya yɛ nza ŋkɛ.» Pa nde sərəakɛ hɛ kadzeghwa nci. Pa nde hwepeyi zewe kwa ghɛmɛ mɛa wəfela ta cɛa nta.

²² Pa hɛ dzeme ghweme ba'a ntikənji kahɛ mahekene pelɛagha, nda zhɛneke geva mbeli nyi kese kaghweze hɛ. Pɛtɛ mbeli nyi kezele hɛ sepamte ŋkwa kaɗema kesleyi hɛ.

²³ Pa mbeli nyi bake shɛhɛ slənji te ŋkwa kewəfərə ta nci, sawanji pelɛ ghweme ba'a jivenji te hələa Zhəwrdɛŋe. Hwa'a hɛ sha Zhozəwɛ, wəzege ta Nəwn, pa hɛ gezemte nda wəshi nyi kemenete nda geva ke hɛ.

²⁴ Ma ke Zhozəwɛ: «Ghəpə yite we, nahe Mahwətə kendeke ɓəmə hɛɗia shɛ mbe dzeve ta ɓəmə, pɛtɛa mbeli nyi te hɛɗia shɛ kaghazlənə va gheɓəmə, pɛtɛ helia nci kesleslamte geva.»