Zhozəwɛ 18 - Ghena ta Shala

Sla ta kwasheghediɗi kezha hwelefefi nyi ketene

¹ Pa pɛtɛa ka Israyɛl tsenete geva mbe Silo, pa hɛ menete cɛ lekwesa kebegeme geva le Mahwətə. Pɛtɛa hɛɗi kafa nda ŋa nci ke hɛ.

² Mberefaŋe hwelefefi nyi kekemavema ŋa nci ŋkwa kaba hwa ka Israyɛl.

³ Ma ke Zhozəwɛ sha ka Israyɛl: «Wa yaneghe yɛ kezha kele hɛɗi nya ndeke ŋayɛ Shala Mahwətə ta ka yitehɛ ŋayɛ wa?

⁴ Tsehave mə mbeli mahekene hwa yayata hwelefe, 'ya kateghwene hɛ yitea slene, kateslə hɛ ba'a kadzeghwamte hɛɗi hɛ kezha newe nza ta ŋkɛ, kehɛɗi kehɛɗi kele ɗa ghena hɛ kase.

⁵ Mberefaŋe mbe nehe hɛɗi hɛ mbe dzeghwa ta ncia shɛ: ma yita ta Zhəwda ne, kwa ghala ta ŋkɛ nza ŋkɛ laka bela kwa zeme, yita ta Zhozɛf ne, te ŋa ŋkɛ ŋkɛ laka bela kwa gwela.

⁶ Katekele ɗa ghena ta nza ta hɛɗi yɛ keghə keghə mberefaŋe kase teke. Kasla kwasheghediɗi 'ya teke kwa kema ta Shala Mahwətə ta ɓəmə, kezha yayata hwelefe ta ŋayɛ.

⁷ Ama kanza ŋkwa shɛ kezha ka Lɛvi nyi hwa gheyɛ we, kwa nza ŋkɛ dzeghe Shala ya kaŋa nci bela ta ŋkwa. Ma Gad, Rəbɛn ba'a kwa bake ta bela ta hwelefe ta Manasɛ ne, nahe hɛ kekemave ŋa nci ŋkwa pelɛ kema ta hələa Zhəwrdɛŋe, laka ŋkwa kesame ta veci, Moyize, nde mene slene ta Mahwətə nde ndeke nda hɛ ke hɛ.»

⁸ Cape mbeli nyi kentave geva kezha newe hɛɗi slə. Ma nda teslə hɛ ne, ma ke Zhozəwɛ gezave nda ke hɛ: «Kwiɗi mə, newemte mə hɛɗi nda se yɛ kageze ɗa nza ta ŋkɛ. Katesla kwasheghediɗi 'ya kezha gheyɛ kwa kema ta Mahwətə mbe Silo.»

⁹ Cape mbelia shɛhɛ, pa hɛ dzeghwamte hɛɗia shɛ. Pa hɛ rafeke nza ta sla ta hɛɗia shɛhɛ mberefaŋe ba'a sləa yɛ meleme ta nci kase sha Zhozəwɛ mbe ghedəkwəa Silo.

¹⁰ Pa Zhozəwɛ slate kwasheghediɗi mbe Silo kwa kema ta Mahwətə, pa ŋkɛ ndeke nda hɛɗi ke ka Israyɛl kala nza ta yita ta nci.

Hɛɗia Bɛnjamɛn

¹¹ Pa ŋa hwelefe ta Bɛnjamɛn ntave geva laka kwasheghediɗi kala nza ta peləa nci. Ma ghala ta ŋa nci ŋkwa ne, kwelɛ ŋa yɛ Zhəwda le ŋa ŋwalea Zhozɛf.

¹² Laka bela kwa gwela ne, slə mbe Zhəwrdɛŋe ghala shɛ kadzeme laka bela kwa gwela ta Zhɛriko, kadzeme mbe ghweme nya laka ŋkwa kepəkwə ta veci hwa'a te ɓerama ta Bɛt-Avɛn.

¹³ Se tagha ne, kadzeyi nde laka Ləwz, kadzawa vare wəmbəa Ləwz nya heka mbeli kaBɛtɛl nya laka bela kwa zeme, kadzawa Atarot-Adar dzeme hwa ghweme nya laka bela kwa zeme yitea Bɛt-Horon nya kwake.

¹⁴ Laka ŋkwa kepəkwə ta veci ta ghwemea shɛ ne, kazhɛre geva nde laka bela kwa zeme kezha ntsehe mbe Kiriyat-Ba'al nya heka mbeli kaKiriyat-Yɛyarim, meleme ta ŋwalea Zhəwda. Tsetse bela nya laka ŋkwa kepəkwə ta veci.

¹⁵ Ma laka bela kwa zeme ne, kagha geva nde te kwa keɗaŋe ta Kiriyat-Yɛyarim, kadzeyi nde laka Gasin ba'a kazhigə nde mɛa yɛ ɗaslea Nɛftowa.

¹⁶ Slə tagha ne, kasawa nde yitea ghweme nya tiɗiɗi le zlərəa Bɛn-Hinom, laka zlərəa Refay nya laka bela kwa gwela. Kadzawa nde laka zlərəa Hinom, vare wəmbəa Zhɛbəs, laka bela kwa zeme, kadzawa nde hwa'a kwa Ɛn-Rogəwɛl.

¹⁷ Kazhɛre geva nde laka bela kwa gwela ba'a kantsehe nde mbe Ɛn-Shɛmɛsh, zhɛne, mbe Gelilot nya tiɗiɗi le ŋkwa kedzeme laka Adəwmim, kasawa nde laka gela ta Bohan, wəzege ta Rəbɛn.

¹⁸ Zhɛkwa ne, kadzeyi nde laka zlərəa Zhəwrdɛŋe, kadzawa nde laka bela kwa gwela hwa'a kwa zlərəa shɛ.

¹⁹ Kadzeyi nde laka bela kwa gwela ta Bɛt-Hogla, kazhigə laka mɛa ndərə kwa Ghwənəghwə, te ŋkwa nya jikə geva ŋkɛ le Zhəwrdɛŋe, laka bela kwa zeme.

²⁰ Ma laka ŋkwa kesame ta veci ne, Zhəwrdɛŋe ya kaghala. Tsetse ghala ta hɛɗi nya kaŋa ŋwalea Bɛnjamɛn, kala nza ta peləa nci.

²¹ Ma meleme nyi kaŋa ŋwalea Bɛnjamɛn kala nza ta peləa nci ne, Zhɛriko, Bɛt-Hogla, Ɛmɛk-Kɛsis,

²² Bɛt-Araba, Semarayim, Bɛtɛl,

²³ Avim, Para, Ofra,

²⁴ Kefar-Amona, Hofni ba'a Gɛba. Meŋe bakeghəmbe meleme nyi jama jama ba'a nyi ɓɛhwɛ ɓɛhwɛ.

²⁵ Kweci ya shɛ: Gabawon, Rama, Beyɛrot,

²⁶ Mispɛ, Kefira, Mosa,

²⁷ Rɛkɛm, Irpɛyɛl, Tarala,

²⁸ Sɛla, Ɛlɛf, meleme ta ka Zhɛbəs, geze ta ŋkɛ, Zhɛrəzalɛm, Gibɛya ba'a Kiriyat. Meŋe wəfaɗeghəmbe meleme nyi jama jama ba'a nyi ɓɛhwɛ ɓɛhwɛ. Nya ya kaghala ta hɛɗia ŋwalea Bɛnjamɛn kala peləa nci.