Zhowɛl 2 - Ghena ta Shala

Takwa takwa vecia Mahwətə kase

¹ Vɛ mə tereme pelɛ Siyon, tsa mə lewela pelɛ ghweme nya keveyi geva tekeleke. Bare bare pɛtɛa mbeli nyi te hɛɗi, kwa nza ŋkɛ se yase vecia Mahwətə, takwa takwa ŋkɛ kase.

² Nahe ŋkɛ kenza kavecia ŋkwesle ba'a viɗi, kavecia ləmbə ba'a meləkwə ləkwə. Se yase ləmbəa yɛ dzale, nahe hɛ kenza kwele kwele ba'a keberete beretenji, yipə yipə le viɗi nya kedəpə geva kənəa yɛ ghweme. Kegha mbeli kanakɛ wəsə nya kala nyagha we, katezhɛne mbeli kanakɛ ŋkɛ tɛape we.

³ Kala ghwə nya ketere ŋkwa ne, kazeme pɛtɛa wəshi hɛ mbe kema ta nci ba'a dɛrɛŋe rɛŋe nza ŋkwa kwa sebe ta nci. Ma tewə hɛ kese ne, kala ntsa ta Ɛdɛn se ŋkwa nya te hɛɗi, ama kwetere wəmbəa nci ne, ɓerama nya dɛrɛŋe rɛŋe ya shɛ. Wəsə shɛ kembele yitea hɛ we.

⁴ Nahe hɛ kenza kala gədəwəa lɛmə, kahwɛ hɛ kala ka zleɗe gədəwəa lɛmə.

⁵ Kagaka hɛ kala yɛ wəmata gədəwə nyi kehwɛ dzeyi kwa ghəa yɛ ghweme keɗema kala ghwə nya ketse te vegheme. Kase hɛ kala ka sewajɛ nyi berete berete nyi kepate geva yitea mpa.

⁶ Nakɛma ta mbeli ke hɛ ne, kabare bare mbeli, kazhɛre pɛtɛa yɛ kema tɛarawe rawe.

⁷ Kahwɛ hɛ kala ka katsala kɛfi, kadzawa hɛ wəmbəa zli kala ka sewajɛ. Yayata wəndə kadzeghwa tiɗiɗi mbe kema ta ŋkɛ, kaɗema kasame kwa hweŋkwa ta ŋkɛ.

⁸ Wəndə shɛ katsəkwə kwete wəndə we, yayata wəndə kadzeghwa tiɗiɗi. Kahwɛ hɛ dzate hwa yɛ have, kaɗema kasame kwa zəɗə.

⁹ Kahwɛ hɛ kalə kadzembe meleme, kahwɛ hɛ dzeyi te zli, kadzeki yɛ ghɛ hɛ dzawa te yɛ wəfela kala ka ghərəa kɛfi.

¹⁰ Ma kase hɛ ne, kagaŋkəɗə hɛɗi, kala wəsə nya ɗe ghweme kateɗe. Kanza veci ba'a tere ngərə ngərə, kazhɛne yɛ saseregwa kaɓele we.

¹¹ Kaŋgezle Mahwətə te kema ta ka sewajɛa ŋkɛ. Nahe ka sewajɛ nyi kefa nda ghena kenza kwele kwele ba'a keberete beretenji. Kaganda ne, nahe vecia Mahwətə kenza dzawe, dzawe fate fate. Wa nde nza kasəwəte ŋkɛ wa?

Və kezhɛre geva kase sha Mahwətə nya

¹² Ma ke Mahwətə gezete: «Və ya shɛ tsetsenya, zhɛre ɗa mə geva kase le wənə kwetɛŋe. Mene mə səwəmayɛ, nehwene mə ba'a ŋgaɗe mə ghə.

¹³ Yɛ lekwesa ta ŋayɛ yaŋkwahe yɛ we, ama wənəa ŋayɛ yazhɛre yɛ.» Kaganda ne, zhɛre mə geva kase sha Shala Mahwətə ta ŋayɛ: nahe ŋkɛ kenza kande ganyɛa mehele ba'a kande zhɛ heli, kande səwə ghena ba'a kande ɗe ŋkwa. Kazəzə ɗa nyi vate ŋkɛ te mbeli ŋkɛ.

¹⁴ Ya kwete katembeɗe zəzə ŋkɛ ba'a katezhɛne ŋkɛ kamene ŋayɛ ganyɛ wa. Tagha gɛ, wərə yɛ kafə nda ha ba'a tɛ kase ke Shala Mahwətə ta ŋayɛ.

Heka ŋkwa yitea səwəmayɛ ba'a səkwə ghə

¹⁵ Vɛ mə tereme pelɛ Siyon, geze mə və kemene səwəmayɛ, zlape mə tsene nya wəba.

¹⁶ Tsene mə mbeli yitea tsene nya keveyi geva tekeleke. Rəkwə mə ka meha mehɛɗi, ka mempɛhwetɛti ba'a ŋwalea fəshi. Shavenyɛ za makwa mbe cɛa ŋkɛ, same nda makwa kwa cɛa nta.

¹⁷ Nehwene ka dzeghe nda melɛ ke Mahwətə mbe ghɛa Shala, kwelɛ yɛ ŋkwa kedzeki le reghwetɛ. Ma ke hɛ sha mpi nda dzeve ke Shala: «Mahwətə yawe, zhɛ heli yitea mbelia ŋa, pəli nda ma hawe na ke mbelia ŋa ma, pelema hwelefefi na kayiɗə n'yɛ ma. ‹Tema Shala ta nci gɛ wa?›, ke hɛ sha tegeze.»

Mahwətə kazhɛne səkwə ta mbelia ŋkɛ

¹⁸ Kwele kwele ɗe hɛɗia ŋkɛ Mahwətə, kazhɛ nda heli yitea mbelia ŋkɛ.

¹⁹ Ma ke Mahwətə zhɛnete nda ke mbelia ŋkɛ: «'Ya katezhɛne kaghwene ŋayɛ ha, tɛ ba'a n'yi nya lɛnɛa. Katenza yɛ behe behe va hɛ. Katezhɛne 'ya kapele kweci hwelefefi kezha yiɗə ŋayɛ tɛape we.

²⁰ 'Ya kateŋka ka jaga ta ŋayɛ nyi kesawa laka bela kwa gwela, 'ya kateŋka hɛ kadzete hɛɗi nya dɛrɛŋe rɛŋe ba'a nya keghwele ghwele, 'ya katebete ka ncɛ kema ta nci kwa ndərə kwa Ghwənəghwə ba'a ka dale sebe ta nci kwa ndərəa Mɛditɛranɛ. Katebeze sefə geva ta ka mpə mpə nyi kezəŋwə ndiremike mike. Tsetse teza sebe te mbeli nyi kese kamene ŋayɛ wəshi nyi ndiremi ndiremi.

²¹ Hɛɗi, ghazlənəma na gɛ ma! Zlama ba'a nza fare fare, kwa nza ŋkɛ kamene wəshi nyi jama jama Mahwətə.

²² Wəshi keseɗa nyi hwa gamba, ghazlənəma yɛ gɛ ma! Ɗa yaɗa gwəzə nyi hwa gamba, ya yaya yɛ wəfe, nahe dasekwa ba'a rɛzɛŋe kenza ŋkeŋkerɛape.

²³ Mbeli nyi mbe Siyon, zlama mə ba'a nza mə fare fare tewəmbəreke Shala Mahwətə ta ŋayɛ. Kame ŋayɛ meŋzleghele ŋkɛ kezha mbele ŋayɛ, kame ŋayɛ va ŋkɛ le vəa ŋkɛ kala nya vəashi.

²⁴ Katenza yɛ tame viɗi viɗi va ha, katenza yɛ weta pɛre pɛre va tɛ ba'a yɛ seka ghɛafe ghɛafe va n'yi.

²⁵ 'Ya kateŋki ŋayɛ wəshia ŋayɛ nyi zehwe yɛ geteɗə, yɛ dzale, yɛ zhamaya ba'a yɛ jagha, wəvəsəa wəshi nyi ghweneke nyi 'ya yitea gheyɛ.

²⁶ Katezeme wəshi kezeme yɛ behe behe, katetsahe sləa ɗa yɛ, 'ya Shala Mahwətə ta ŋayɛ nya kemene ŋayɛ wəshi meŋele. Katezhɛne hawe kadzete mbelia ɗa tɛape we.

²⁷ Tagha gɛ, kateɗepete yɛ 'ya ya hwa gheyɛ, gheyɛ ka Israyɛl, 'ya ya kaMahwətə Shala ta ŋayɛ, kwete Shala shɛ we. Katezhɛne hawe kadzete mbelia ɗa tɛape we.»