Zhonas 3 - Ghena ta Shala

Zhonas kazlape ghena ta Shala kwa Ninive

¹ Pa Mahwətə gezete nda ghena ke Zhonas kakwa bake zhigə:

² «Sate, kwiɗi kadzawa Ninive, meleme nya wəba, shɛ na gezete nda ghena nyi tegeze ŋa 'ya ke mbeli nyi mbe» a ke shɛ.

³ Ma vəa ŋkwa shɛ, pelɛhetɛme Zhonas sate te ŋkwa, pa yɛte ghena nya gezete nda Mahwətə, cape ŋkɛ kadzawa Ninive. Ma Ninive ne, meleme nya wəba ŋkɛ. Hɛ mahekene mene mbeli nda nza mbeli kajivenji mbe pɛkwe pelɛ kwete bela.

⁴ Pa Zhonas dzembe melemea shɛ, veci veci ŋkɛ kadzeghwa mbe. Ntake kazlape nda ghena ta Shala ke mbeli kala nya: «Tene hɛ wəfaɗemsə, terayɛ tenza sebe te Ninive» a ke.

⁵ Pa mbeli nyi mbe Ninive yɛte ghena ta Shala megela. Pa hɛ zlapete səwəmayɛ, kaseɗete lekwesa kenehwene se te meha mehɛɗi hwa'a te ŋwalea fəshi.

⁶ Ma kwa fate ghena shɛ meghea ka Ninive, pa sawanyɛ pelɛ pasla ta ŋkɛ. Pa ŋkɛ seɗemte lekwesa meghea ŋkɛ, hwepahwe wəsə hwa hwə ba'a ntishɛnyɛ hwa pəsəɗə.

⁷ Kwetere wəmbəa ŋkɛ, pa gezete kezha zlape ghena nya mbeli mbe Ninive: «Kala ghena nya gezeke yɛ meghe le mbelia jama ta ŋkɛ, yagha mbeli zlaɓe le wəshi keseɗa nyi jama jama le nyi ɓɛhwɛ ɓɛhwɛ kandɛme wəsə ba'a kasa yɛmə.

⁸ Kateseɗe lekwesa nehwene mbeli ba'a wəshi keseɗa. Katetsa nda lewela hɛ ke Shala le pɛtɛa berete ta nci, katesərə dzeghwa kwa ndiremia ŋkɛ yayata wəndə ba'a katefɛa ŋkɛ mene berete nyi mene dzeve ta ŋkɛ.

⁹ Wa ɗepe nda kwete kasərəakɛ ghena nya zəzəte Shala kamene ŋkɛ ba'a kasərəakɛ beze ta wənəa ŋkɛ ŋkɛ kaɗema kampəmte ɓəmə wa?»

¹⁰ Nahe Shala kenakɛ wəshi nyi mene ka Ninive: zhɛre yazhɛre nza ta nci hɛ va wəshi nyi ndiremi ndiremia nci. Ma tsagha ɓiyitsa, pa Shala sərəakɛ beze ta wənəa ŋkɛ, pa ɗema kamene wəsə kwa ndiremi nya ɗete ŋkɛ kamene nda ke hɛ kaghate.