Zhonas 2 - Ghena ta Shala

Səkwə ghə ta Zhonas

¹ Pa Mahwətə ghwenakɛ kwete kelepe kewəbanyɛ kandahwe Zhonas. Veci mahekene ba'a viɗi mahekene menete Zhonas kwa hwa'a kelepe.

² Ma kwa hwəa kelepe ŋkɛ, ntake ŋkɛ kasəkwə Mahwətə, Shala ta ŋkɛ kala nya:

³ Ma kwa nza 'ya mbe yaka, nahe 'ya ketsate ŋa lewela Mahwətə, nahe na kezhɛnete ɗa. Kwa nza 'ya kwa mɛa mte ne, nahe 'ya kehekate ŋa yitea kemane ɗa, nahe na kefate ghena ta ɗa.

⁴ Pa na negheyi ɗa kwa ndərə, kwa ŋkwəɗəa yɛmə. Bətə 'ya kwa yɛmə nya kedzasle ɗa, pɛtɛ gaŋkeɓe ta ghwa nya menete na le yɛmə kənəa 'ya.

⁵ Tagha ne, ma 'ya: «Nahe na keŋkamte ɗa cakeɗake kwa ntsə ta ŋa, ndagwara mba 'ya kaɗe kanewe ghɛa ŋa nya wɛŋe.»

⁶ Pa yitea ŋwələ se yɛmə va 'ya. Kwa tepe ta ndərə se 'ya bətə, dzasle se ghəa ɗa va nɛ.

⁷ Hwa'a kwa yitea seɗa ta ghweme se 'ya, na ghɛa mbelia kwahɛɗi keŋzlete degha ta ŋkɛ yitea 'ya kaghala ghala. Ama gha Mahwətə, Shala ta ɗa, nahe na kekelakame ɗa le mpi same kwa ki.

⁸ Kwa ɗe mpia ɗa kaza, nahe 'ya kezəzəte ŋa Mahwətə. Nahe səkwə ta ɗa kentsehe sha gha, pa pelɛ ghɛa ŋa nya wɛŋe.

⁹ Ma mbeli nyi kehawe va kweci shala ne, mbele ta nci yatezamte hɛ.

¹⁰ Ama 'ya ne, katetsahe ŋa 'ya kwa cimə, katedzeghe ŋa melɛ 'ya, katemene ŋa wəshi nyi meɗeyi ŋa 'ya kamene 'ya. E'e, gha nde mbele ŋkwa Mahwətə!

¹¹ Ma tsagha, kwa gezete nda Mahwətə ke kelepe, pa vənəhwəyi Zhonas mɛa hələbə.