Zhɛrɛmi 52 - Ghena ta Shala

Nabəkodonozor kesehwe Sɛdɛsiyas

¹ Ma nda dzembe meghe Sɛdɛsiyas ne, bakemsə kwetɛŋeghəmbe va ta ŋkɛ. Va meŋe kwetɛŋeghəmbe menete ŋkɛ te meghe mbe Zhɛrəzalɛm. Haməwtal, wəzha ta Irmɛya nya kande Libna sləa meghekɛ.

² Wəsə nya kehitema geva kwa kema ta Mahwətə yamenete Sɛdɛsiyas, kala nya menete Zhowakim.

³ Pa wəsə nya kemenete geva mbe yɛ Zhɛrəzalɛm le Zhəwda hwepete nda wənəa Mahwətə. Vatse neghamte mbelia ŋkɛ ŋkɛ cakeɗake le. Pa Sɛdɛsiyas ɗema ghena ta Nabəkodonozor, meghea ka Babilone.

⁴ Tagha gɛ, mpəɗə Nabəkodonozor senyɛ le ka sewajɛa ŋkɛ pɛtɛ kaɗa Zhɛrəzalɛm. Pa ka sewajɛa ŋkɛ menete ghedəkwəa nci kwa kema ta meleme ba'a late ki dzeyi yite. Te kwa mesli ta va ta Sɛdɛsiyas te meghe, te kwa meŋe ta tere, te kwa meŋe ta hɛ menete geva ŋkɛ.

⁵ Nahe mpa shɛ ketemə pa te kwa meŋe kwetɛŋeghəmbe ta va ta Sɛdɛsiyas mbe meghe.

⁶ Pa ma menete geva dzawe mbe Zhɛrəzalɛm, wəsə shɛ mba kazeme mbeli we. Te kwa mesli ta hɛ mbe tere kwa wəfaɗe ne,

⁷ mpahwe ka Babilone ntsate wəfela te zli nya yitea meleme. Ma heviɗi ne, pɛtɛ ka sewajɛa ka Zhəwda hwɛnji. Mba ka Babilone dzasle yitea Zhɛrəzalɛm. Ya tsagha shɛnyɛ ŋkɛ ne, kweracɛ ka sewajɛ hwɛnji shave mbe meleme laka mɛ degha nya te zli, nya takwa yitea ntsa ta meghe. Cape hɛ kwa hweŋkwa nya kedzawa laka zlərəa Zhəwrdɛŋe.

⁸ Ama pa ka sewajɛa ka Babilone kekate meghe Sɛdɛsiyas ba'a keseve ŋkɛ te ŋwela ta Zhɛriko. Pɛtɛa ka sewajɛa ŋkɛ kehwɛnji yite.

⁹ Hecape ka Babilone keseve meghe Sɛdɛsiyas kamava ba'a keleghe nda ke meghea ka Babilone mbe Ribla, te hɛɗia Hamat. Tagha mehate ghwə ta meghe Sɛdɛsiyas ŋkɛ.

¹⁰ Mbe Ribla shɛ mpəmte ŋwalea Sɛdɛsiyas ŋkɛ kwa ntsə ta yiteyɛa nci, tsagha mbeli nyi te ghə mbe Zhəwda pɛtɛ.

¹¹ Kwa sebe ta ŋkɛ, mpahwe mpahwe ŋkɛ ntsamte ntsə kwa ghə va Sɛdɛsiyas ba'a hwepete le zewe lɛ mze kwa ghwə ghwə. Tagha gɛ, laŋe ŋkɛ te kadzeme Babilone, fɛke ŋkɛ shɛ kwa daŋgayɛ pa te mte ta ŋkɛ.

Nebəwzaradan mpəate Zhɛrəzalɛm pɛtɛ te hɛɗi

¹² Te kwa meŋe meslighəmbe ta va ta Nabəkodonozor mbe meghe, le hɛ meŋe mbe tere kwa mcɛfe ne, shilimə Nebəwzaradan mbe Zhɛrəzalɛm. Gheŋkɛ ya te ghəa ka sewajɛ nyi keya meghea ka Babilone, kwete ŋkɛ hwa mbelia jama nyi yite.

¹³ Dəvə ŋkɛ sha ghwə yitea ghɛa Mahwətə, ŋa meghea ka Zhəwda, tsagha ghɛ nyi mbe Zhɛrəzalɛm pɛtɛ, halama ŋa mbelia jama nyi kemene slene.

¹⁴ Pa ka sewajɛa ka Babilone mpəate zli nya yitea Zhɛrəzalɛm te hɛɗi.

¹⁵ Kwa sebe ta ŋkɛ, pa Nebəwzaradan fəhwe mbeli nyi ketene mbe meleme: kweci ka titikwəa kɛfi, mbeli nyi kendeke nde ghəa nci ke meghea ka Babilone ba'a ka ɗepe mene wəshi nyi ketene.

¹⁶ Ama pa sərəakɛ kweci ka titikwəa kɛfi kezha wəza wəvea rɛzɛŋe ba'a kweci wəve.

¹⁷ Pa ka Babilone mpempəmte selə nyi kamze kwa ghwə ghwə mɛa ghɛa Shala, tsagha yɛ wəmata gədəwə nyi ɓɛhwɛ ɓɛhwɛ ba'a kwenə nya wəba kakwa mze kwa ghwə ghwə nyi beteyi mbeli mbe ghɛa Mahwətə. Pɛtɛ hɛ fəghe mze nyighɛ kadzeme Babilone.

¹⁸ Pa hɛ fəte kweci wəshi mze kwa ghwə ghwə, nyi mene slene mbeli le hɛ mbe ghɛa Shala: wəshi kefə pəsəɗə, yɛ pelɛ, wəshi kepesle ghwə kwa paterela, yɛ kwenə kepisə ŋkwa ba'a yɛ zlerekwe.

¹⁹ Pa wəndə nya te ghəa ka ya ŋkwa fəte kweci wəshi mze kwa tere tere ba'a kwa ghwə: yɛ kwenə, wəshi nyi tere 'wərdə mbeli kwa, kwenə kepisə ŋkwa, wəshi kefə pəsəɗə, wəshi kepesle ghwə kwa paterela, wəshi kesa yɛmə ba'a kweci kemene slene.

²⁰ Nahe meghe Salomon kemenete wəshi kwele kwele le mze kwa ghwə ghwə kezha ghɛa Mahwətə: selə bake, kwenə nya wəba nya ntare te pa ta mcɛmcɛli meŋe bakeghəmbe ba'a yɛ wəmata gədəwə. Kadzeghete ɗaŋeɗa ta mzea shɛ mbeli we.

²¹ Geze ta ŋkɛ, yayata selə ne, mɛtre mesli biya ta ŋkɛ kadzeme ghweme ba'a mɛtre ŋkwaŋe dekea ŋkɛ. Ghwəarara ŋkwa nya mbe hwəa nci, deghese kwa gwəmsə ta bela ta mɛtre deɓedea mze kwa ghwə ghwə.

²² Ma pelɛ ghəa yayata selə ne, wəsə ya shɛ kala derə meghe kamze kwa ghwə ghwə, mɛtre bake ba'a gasle yite biya ta ŋkɛ kadzeme ghweme. Kerafe rafe ŋkɛ le wəshi nyi tsate mbeli le mze kwa ghwə ghwə kala getse dzeyi yite ba'a kamenete kweci kala yɛ ya ta kwakweme. Yipə yipə selə nyi bake nyighɛ, tsagha rafe ta nci:

²³ Ma ya ta kwakwemea shɛhɛ ne, meslimsə ŋkwaŋeghəmbe hɛ te yɛ bela ta ŋkɛ, geze ta ŋkɛ ya gwəmsə ya dzasle yitea wəsə mze kwa ghwə ghwə nya tsate mbeli kala getse.

²⁴ Pa wəndə nya te ghəa ka ya ŋkwa kesehwe yɛ Seraya, sləwəfəa ŋkɛ Sefaniya ba'a ka dzeghe Shala mahekene nyi keya ŋkwa kedzembe ghɛa Mahwətə.

²⁵ Pa kesehwe kwete wəndə kwelea ka sewajɛ ba'a mbeli nyi yitea meghe mberefaŋe, tsagha nde rafe nda wəshi ke wəndə nya te ghəa ka sewajɛ, nya keve ŋkwa mbe sewajɛ ba'a ka Zhəwda ŋkwaŋemsə. Pɛtɛa mbeli nyighɛ ne, mbe Zhɛrəzalɛm hɛ.

²⁶ Pa Nebəwzaradan fəghe hɛ kalə sha meghea ka Babilone mbe Ribla.

²⁷ Mɛke ŋkɛ mpəmte hɛ te ŋkwa shɛnyɛ te hɛɗia Hamat. Kala nya fəmte ka Zhəwda mbeli cakeɗake le hɛɗia nci.

²⁸ Wa nya ɓela ta mbeli nyi fəhwe Nabəkodonozor mbe va kwa mberefaŋe ta ŋkɛ te meghe: ka Zhəwda 3.023.

²⁹ Ma te kwa meŋe degheseghəmbe ta va ŋkɛ te meghe: ka Zhɛrəzalɛm gwəmsə deghese ba'a mahekenemsə bakeghəmbe.

³⁰ Te va kwa bakemsə mahekeneghəmbe ta va ta Nabəkodonozor te meghe ne, pa Nebəwzaradan, wəndə nya te ghəa ka ya ŋkwa, fəghe ka Zhəwda gwəmsə mberefaŋe ba'a wəfaɗemsə mcɛfeghəmbe zhɛkwa. Mbeli 4.600 mbelia shɛhɛ pɛtɛ.

Meghea ka Babilone pelakɛ Zhowakin

³¹ Kwa sebe ta va mahekenemsə mberefaŋeghəmbe nya kesehwe Zhowakin meghea ka Zhəwda mbeli ne, pa Ɛvil-Mɛrodak dzete meghe mbe Babilone te kwa meŋe bakeghəmbe ta tere mbe kwa bakemsə mcɛfeghəmbe. Waɗe ŋkɛ pelakame Zhowakin same kwa daŋgayɛ.

³² Ntake ŋkɛ kageze nda ghena megela ba'a pa ŋkɛ ndeke nza te ghəa ka meghe nyi mbe Babilone.

³³ Pa meghe seɗemte nda lekwesa daŋgayɛa ŋkɛ ke Zhowakin, ntake ŋkɛ kazeme wəsə kezeme zlaɓe le meghea ka Babilone keveci keveci kaɗema ghena shɛ.

³⁴ Tsetse kemave wəshi kezemea ŋkɛ Zhowakin va meghea ka Babilone keveci keveci pa te mte ta ŋkɛ.