Zhɛrɛmi 50 - Ghena ta Shala

Teɗe ta Babilone ba'a pele ta Israyɛl waɗe

¹ Wa nya ghena nya geze Mahwətə te ghəa Babilone nya te hɛɗia ka Kaldɛ laka nde mɛ ŋkwa Zhɛrɛmi nya:

² «Zlape nda mə ghena nya ke kweci hɛɗi, ncɛ mə laka wəshi kencɛ wəshi, zlape mə kaɗema wəfərə kwete hwe. Ma pe yɛ: Nahe Babilone kekelehwe geva! Hawe ya te wəshi nyi zhɛrete ŋkɛ kashala, kwetɛ kwetɛŋe mehele ta yɛ shala tseŋwəa ŋkɛ. Shewə Bɛl va hawe, kwetɛ kwetɛŋe mehele ta Mardəwk.

³ Kwete hwelefe kasawa laka bela kwa gwela kaɗa Babilone. Katezhɛre hɛɗia ŋkɛ ŋkɛ kaɓerama nya dɛrɛŋe rɛŋe, wəndə shɛ kazhɛne kanza te we. Pɛtɛ tehwɛnji mbeli ba'a wəshi keseɗa, rayɛ teza sebe te hɛ.»

*

⁴ Ma ke Mahwətə: «Ma vəa ŋkwa shɛ ne, katese ka Israyɛl le ka Zhəwda kanya kwetɛŋe. Katedzeghwa hɛ le nehwene kezha zele ɗa, 'ya Shala Mahwətə ta nci.

⁵ Kate'yɛwe hweŋkwa kedzeme Siyon hɛ, katezhɛre kema hɛ laka melemea shɛ. Katese hɛ kajikə geva le 'ya laka jikə geva nya kaghala ghala, nya ɗema hɛ katezaghə tɛape.

⁶ Katimɛti nyi kezanji zhɛrenji mbelia ɗa. Nahe mbeli nyi keya hɛ kezamte hɛ, nahe hɛ kepelakɛ hɛ kadzeme hwa yɛ ghweme. Slə mbe nya ghweme hwa'a mbe nya dzeghwa hɛ, kezhɛne hɛ kaɗepe zlema ta nci we.

⁷ Nda mpeɗe yampeɗe hɛ wəshi nyi kebegeme le hɛ. Ma ke ka jaga ta nci sha geze: ‹Kebezemte ghena n'yɛ we, kwa nza hɛ kaka fete sha Mahwətə nya kaŋkwa kewəfərə ganyɛ nya vate ghə ka shihɛ nci te.›»

*

⁸ Hwɛ ŋayɛ mə shave mbe Babilone, slə ŋayɛ mə te hɛɗia shɛ! Nza mə kala zhɛfa lɛmə nyi kencɛ nda hweŋkwa ke wəshi keseɗa.

⁹ Va nya nza ŋkɛ ne, katefeɗeghe kweci hɛɗi nyi jama jama 'ya, kateghwene hɛ 'ya kampa le Babilone. Sawa laka bela kwa gwela tesawa mbelia shɛhɛ, katepa geva hɛ yitea mpa le meleme shɛ ba'a katekelehwe hɛ. Kala katsala sewajɛ nya keɗema kasheke pala pala have ta nci.

¹⁰ Katefə geva wəshi shave hɛɗia Babilone. Ma mbeli nyi ketefə wəshia nci ne, kala nya ɗe hɛ tefə mcɛlə hɛ. Mahwətə nde gezete.

¹¹ Nza mə fare fare ba'a wetse mə va zlama, gheyɛ mbeli nyi ketazemte hɛɗia ɗa! Jɛgwəli mə kala levea lɛməa sla te gwəzə menjaɓa, Tsa mə yɛyi kala yɛ gədəwə!

¹² Shewə meyɛ ŋayɛ va hawe, bətə zləvəa male nya keyake ŋayɛ. Ma tsetsenya ne, hɛɗia ŋayɛ ya kwa sebe, kaɓerama ba'a kahɛɗi keghwele ghwele ŋkɛ.

¹³ Va hwepe wənəa Mahwətə ne, wəndə shɛ te hɛɗia ŋayɛ we, kaɓerama nya dɛrɛŋe rɛŋe nya wəba ŋkɛ. Kwetɛ kwetɛŋe nza mehele ta pɛtɛa mbeli nyi kedzeyi vare Babilone, ketenakɛ wəshi nyi kemenete nda geva hɛ. Katetsa lewela hɛ va wəshia shɛhɛ.

¹⁴ Gheyɛ ka ɗepe he have, dzaslete mə geva Babilone. He mə ŋkɛ le have, wəmbəyima have yɛ ma, kwa nza ŋkɛ kande fete sha Mahwətə.

¹⁵ Tsa mə kaka kempa shave mbe yayata bela yite! Dzeve yaslete ŋkɛ kezha wa ghəa ŋkɛ. Ŋzla yaŋzla cɛa ŋkɛ nyi bebiya bebiya, ŋzla yaŋzla zli nya yite. Mahwətə nde vate ɗa te. Wate mə ghəa ŋayɛ te Babilone gɛ! Mene nda mə wəsə nya menete nda ŋkɛ ke kweci mbeli!

¹⁶ Zamte mə sebe te mbeli nyi ketsawe wəshi ba'a nyi kemene wəshi se te wəve mbe Babilone. Kwa kema ta mpa kwa zhɛma heli ne, zhɛneghe geva yayata wəndə kalə sha ghɛa ŋkɛ, hwɛnyɛ ŋkɛ kadzete hɛɗia ŋkɛ!

¹⁷ Kala təmə nya kezanyɛ nya keka yɛ nivɛrə se Israyɛl. Meghea ka Asiri nde ghate kampeɗehwe. Kwa sebe ta ŋkɛ, pa Nabəkodonozor, meghea ka Babilone mpəmte 'yɛ'yɛa ŋkɛ.

¹⁸ Vatse gɛ, wa nya ghena nya geze Mahwətə nde berete, Shala ta ka Israyɛl nya: «'Ya kateme te meghea ka Babilone ba'a te hɛɗia ŋkɛ, kala nya meghə 'ya kənəa meghea ka Asiri.

¹⁹ Ama katezhɛneke ka Israyɛl 'ya te ŋkwa kezeme gwəzəa nci. Katezeme gwəzə hɛ dzeme hwa ghweme ta Karmɛl ba'a hwa ŋa Bashan, behe behe tenza hɛ dzeme hwa ghweme ta Ɛfrayim ba'a te hɛɗia Gala'ad.

²⁰ Ma 'ya, 'ya Mahwətə: ma vəa ŋkwa shɛ ne, katezele fete ta Israyɛl mbeli, ama katenza shɛ we. Katezele beze ghena ta Zhəwda mbeli, ama katekemave mbeli we. Kwa nza ŋkɛ katekelemte nda fete ta mbeli nyi tesərə 'ya teghweme 'ya te wənə.»

²¹ Ma ke Mahwətə sha ka Babilone nyi kaka jaga: «Have nda mpa ke hɛɗia Maratim. Kwiɗi kaɗa ŋkɛ ba'a kaɗa hɛɗia Pɛkod. Mpəmte hɛ, zamte sebe te hɛ pa te nde keɗaŋe ba'a menete kala nya gezave ŋa 'ya.

²² Gaka ta mpa yafa mbeli te hɛɗi. Wa nya ndiremi gɛ!

²³ Tsema mpəmte geva Babilone nya kese kandevele nya kempə hɛɗi lema ɓɛhwɛ ɓɛhwɛ mbe gɛ wa? Tsema zhɛrenyɛ Babilone kaɓerama nya dɛrɛŋe rɛŋe hwa kweci hɛɗi gɛ wa?

²⁴ Babilone, nahe 'ya keŋate ŋa keleŋa, ama kɛakwe ŋkɛ kesehwe ŋa kaɗepetema na. Nahe na kentsate geva ba'a kekeseve geva, va nya nza ŋkɛ 'ya Mahwətə yahave ɗa mpa na.»

²⁵ Nahe Mahwətə keghwenemte ŋkwa kewəfərə wəshia ŋkɛ ba'a kefəakave wəshi kempa ta hwepe wənəa ŋkɛ. Katenewe slene ta Shala Mahwətə nde berete mbeli te hɛɗia Babilone.

²⁶ Se mə te yayata ŋkwa kadzembe melemea shɛ, fəmte mə wəshi mɛa yɛ tame ta ŋkɛ, tsenete mə mcɛləa ŋkɛ tərəsə, zamte mə sebe te melemea shɛ! Yagha wəsə tetene mbe.

²⁷ Mpəmte mə ka katsala ka sewajɛa ŋkɛ pɛtɛ, fəghe mə hɛ kadzete ŋkwa kempə ŋkwa! Wa nya ndiremi te hɛ, kwa nza ŋkɛ nahe və keme ta Mahwətə te hɛ kese gɛ!

²⁸ Fa mə: ma ke mbeli nyi kehwɛnji, nyi kembelenji sawa pelɛ Babilone sha Siyon: «Nahe Shala Mahwətə ta ɓəmə kewate ŋa dewa, nahe ŋkɛ kewate dewa ta ghɛa ŋkɛ.»

²⁹ Tseneke mə ka ɗepe he have, ghweneghe mə hɛ kalə kaɗa Babilone. Dzaslete mə ŋkɛ tekelɛke! Yagha wəndə tembele! Menete nda mə wəsə kwa ndiremi nya se ŋkɛ kamene nda ke kweci mbeli! Kaganda ne, kande kele ghə se ŋkɛ laka Shala Mahwətə ta ka Israyɛl nya tekeleke.

³⁰ Ma ke Mahwətə: «Ma te vecia shɛ gɛ, katebete megelɛshia ŋkɛ dzeyi te yɛ ŋkwa kebeke ba'a mɛke tenza sebe te ka sewajɛa ŋkɛ.

³¹ Kabegeme mə le gha, Babilone nya kekele ghə, 'ya Shala Mahwətə nde berete nde geze. Nahe vəa ŋa kese tsetsenya, və nya teme 'ya te gha.

³² Katetsa kwa kele ghə tehene ba'a kateteɗe ŋkɛ. Wəndə shɛ katekese sate te ŋkwa we. 'Ya katendə ghwə yitea yɛ meleme ta ŋkɛ, pɛtɛ tetere hɛɗi nyi dzeyi yite ŋkɛ.»

³³ Wa nya ghena nya geze Mahwətə nde berete nya: «Nahe mbeli kesahwe nda yaka ke ka Israyɛl, tsagha ke ka Zhəwda perə. Nahe mbeli nyi kefəhwe hɛ kekeseyi hɛ, hɛreɗɛ hɛ ɗema pele hɛ.

³⁴ Ma 'ya nya kekelehwe ghena nya te hɛ ne, bereteke 'ya, 'ya ya kaMahwətə nde berete. Va 'ya ghena ta nci kezha ve nda kwelɛŋe ke hɛɗi ba'a kezha ve ndiremi te Babilone.»

Wəsə nya zəzə Mahwətə kamene nda ke Babilone

³⁵ Ma ke Mahwətə: «Ha nda mə mpa ke Babilone, ke mbeli nyi mbe, ke mbeli nyi te ghə mbe ba'a ke ka ntsehwele ntsehwele nyi mbe!

³⁶ Mpə mə ka ŋa zlera ta ŋkɛ nyi keɗepema kwete ghena! Mpə mə ka sewajɛa ŋkɛ nyi nza mehele ta nci keyirə yirə!

³⁷ Mpə mə yɛ gədəwəa ŋkɛ ba'a yɛ wəmata gədəwəa ŋkɛ, mpə mə kweci hwelefefi nyi kakemane, nza hɛ kaka dewə beretea zhili! Mpə mə ŋkwa kebete wəshia ŋkɛ, fəhwe wəshia ŋkɛ mbeli!

³⁸ Shifənji yɛmə dzeyi kwa yɛ hələa ŋkɛ! Kwa nza ŋkɛ ne, hɛɗi nya nza yɛ shala tseŋwə, wəshia kwadanji nyi kekese mehele ta mbeli nyi te ŋkɛ.

³⁹ Vatse tenza yɛ wəve ba'a yɛ deghwavaŋwe mbe Babilone, katenza yɛ zhenɛgə mbe. Katezhɛne mbeli kanza mbe Babilone tɛape we, shaka shaka tenza ŋkɛ kaghala ghala.»

⁴⁰ Ma ke Mahwətə: «Kala ɗa nya kese te Sodome le Gomore teve ɗa 'ya te yɛ Babilone le hɛɗi nyi dzeyi yite. Wəndə shɛ katezhɛne kanza mbe we, wəndə ŋelɛ shɛ katedzeghwa mbe we.

⁴¹ Kweci mbeli kasawa laka bela kwa gwela, hwelefe nya wəba ba'a ka meghe kwele kwele kase te mendɛkwe ta hɛɗi.

⁴² Yɛ gwecɛ le megha ya va ka sewajɛa nci, kaka ghyana ghyana ba'a kaka zhɛma heli hɛ. Kala gaŋkeɓe ta ndərə gaka hɛ. Pelɛ gədəwə hɛ ba'a nahe hɛ kepate geva yitea mpa le gha, meleme ta Babilone!

⁴³ Ma kwa fate ghena shɛ meghea ka Babilone ne, kwetɛ kwetɛŋe mehele ta ŋkɛ tazenyɛ, pɛtɛ geva ta ŋkɛ mtenyɛ, ntake kaheha kala male nya zhɛ nda ya.

⁴⁴ Kala nivɛrə nya keshave mbe gamba nya dzeyi mɛa Zhəwrdɛŋe kadzete ɗasle tenza 'ya. Kala metɛ ta ntsə tefəmte mbeli 'ya pɛtɛ. Ma kwa sebe ta ŋkɛ, kateve wəndə nya ntave 'ya 'ya mbe Babilone. Kwa nza ŋkɛ, wa wəndə nya kala 'ya wa? Wa wəndə nya nza 'ya kaghereŋe te ghwə le wa? Wa wəndə nya te nya kenza kazhɛnete ɗa ghə wa?»

⁴⁵ Fa mə wəsə nya zəzəte Mahwətə te ghəa Babilone, wəshi nyi tarete ŋkɛ kamene nda ke mbeli nyi mbe. Kaganda ne, katentsehe hɛ mbeli kala wəshi keseɗa, ya nyi ɓɛhwɛ ɓɛhwɛ. Pɛtɛ teŋzla zlema ta nci tewəmbəreke hɛ, ghəpə yite we.

⁴⁶ Ma kezlapete mbeli: «Nahe Babilone kekelehwe geva» ne, ntake hɛɗi kagaŋkəɗə, kafefa lewela nya wəba mbeli te kweci hɛɗi.