Zhɛrɛmi 45 - Ghena ta Shala

Ghena ta Mahwətə ke Barək

¹ Ghena nya geze nda nde mɛ ŋkwa Zhɛrɛmi ke Barək, wəzege ta Nɛriya, kwa rafe ghena shɛhɛ Barək kadzete palepa vəa ŋkwa nya geze nda hɛ Zhɛrɛmi, te kwa wəfaɗe ta va ta Zhowakim, wəzege ta Zhoziyas, meghea ka Zhəwda:

² «Wa nya ghena nya geze Shala Mahwətə ta ka Israyɛl nya te gha Barək:

³ Ma pa na sha geze: ‹Wa nya yaka te 'ya wa! Nda mtsehe yamtsehe kweci yaka Mahwətə kadzeghəa nyi te 'ya. Leɓakwe 'ya va ŋələvə, kakemave zhɛne mpi 'ya we.›

⁴ Ma gɛ, wa nya ghena nya ndeke ɗa Mahwətə kageze ŋa nya: ‹Ŋzla yaŋzla ŋkwa nya ŋate 'ya 'ya, nteɗe yanteɗe wəsə nya mɓete 'ya 'ya. Tsagha mene 'ya te hɛɗi lema.

⁵ Ma gha ne, wəshi nyi jama jama ya'yɛwe na kamene kezha ghəa ŋa na? 'Yɛwema kwete wəsə na ma, kwa nza ŋkɛ, 'ya kateve ɗa te yayata wəsə nya nza mpi hwe. Ama gha ne, wa nya wəsə nya tekemave na va 'ya nya: katesərə ŋa 'ya le mpi te yayata ŋkwa nya telə na. Nya ya kaghena nya geze 'ya, 'ya Mahwətə.›»