Zhɛrɛmi 43 - Ghena ta Shala

Mbeli keleghe Zhɛrɛmi le berete kadzawa Ɛzhipte

¹ Ma kwa kiɗimte geze nda ghena nyi gezeke Shala Mahwətə ta nci Zhɛrɛmi ke mbeli pɛtɛ, pɛtɛa ghena nyi gezave nda ŋkɛ kezha geze nda ke hɛ ne,

² ma ke yɛ Azariya, wəzege ta Hoshaya, Yohanan, wəzege ta Karɛya ba'a kweci ka fegea kɛfi sha Zhɛrɛmi: «Tseŋwəa ŋa, Shala Mahwətə ta ɓəmə nde ghwenakɛ ŋa kageze: ‹Dzawama yɛ kawəfərə kwa Ɛzhipte ma›, ke we!

³ Barək, wəzege ta Nɛriya, nde heɗeyite ŋa yitea ghen'yɛ, kwa ɗe ŋkɛ kave nda ɓəmə ke ka Babilone kezha mpəmte ɓəmə hɛ keɗema kezha fəghe ɓəmə kajive Babilone.»

⁴ Tsagha yɛ Yohanan, wəzege ta Karɛya, mbelia jama nyi te ghəa wəvəsə ka sewajɛ le kweci mbeli yitea hɛ, hɛreɗɛ hɛ ɗema fa ghena ta Mahwətə nya kegeze nda ke hɛ kezha nza te hɛɗia Zhəwda.

⁵ Pa yɛ Yohanan, wəzege ta Karɛya le kweci mbelia jama nyi te ghəa wəvəsə ka sewajɛ fəghe ka Zhəwda nyi ketene te ghweme, kweci mbeli nyi kezhɛneke geva kadzembe Zhəwda, kwa sebe ta nya tazeyi hɛ mbe kweci hɛɗi nyi dzeyi yite:

⁶ zhili, mi, ŋwale, ŋwalea kwɛ meghe ba'a pɛtɛa mbeli nyi fəave nda Nebəwzaradan, wəndə nya te ghəa ka ya meghe ke Gedaliya, wəzege ta Ahikam ba'a shia ta Shafan, tsagha yɛ nde mɛ ŋkwa Zhɛrɛmi le Barək, wəzege ta Nɛriya.

⁷ Hɛreɗɛ hɛ ɗema fa ghena va Mahwətə, ntəŋə hɛ kadzawa Ɛzhipte, hwa'a hɛ mbe Tapanɛs.

Zhɛrɛmi kancɛ ɗa nya ketedzete Ɛzhipte

⁸ Ma ke ghena ta Mahwətə gezeke nda geva ke Zhɛrɛmi mbe Tapanɛs:

⁹ «Ntave pelɛ nyi jama jama shɛ na leyi hɛ mbe rekɛ ghene nya mɛa ŋkwa kedzeki ghɛa meghe Farawon, mbe Tapanɛs. Menete kwa ntsə ta ka Zhəwda.

¹⁰ Kwa sebe ta ŋkɛ, ma pa na sha hɛ: ‹Wa nya ghena nya geze Mahwətə nde berete, Shala ta ka Israyɛl nya: 'Ya kateghwene ŋkwa kazele nde mene slene ta ɗa Nabəkodonozor, meghea ka Babilone, kateve pasla ta ŋkɛ 'ya te pelɛ nyi leyi nyi 'ya teke. Kənəa hɛ temɓe cɛ lekwesa ta ŋkɛ ŋkɛ.

¹¹ Ma ketese ŋkɛ ne, kateɗa hɛɗia Ɛzhipte ŋkɛ. Ma Katempə mbeli nyi keveyi geva kampə ŋkɛ, katefə mbeli nyi keveyi geva kanza kaka mavashi ŋkɛ, katempə mbeli nyi keveyi geva kampə va kafayɛ ŋkɛ.

¹² Katendə ghwə ŋkɛ yitea yɛ ghɛa yɛ shala ta ka Ɛzhipte. Katetere yɛ shala shɛhɛ keɗema katefəhwe hɛ ŋkɛ. Katefə wəshi nyi mbe Ɛzhipte ŋkɛ le mehele kala nya tseha tɛaŋɗɛ nde ya wəshi yitea lekwesa ta ŋkɛ. Kwa sebe ta ŋkɛ, kazhɛne geva ŋkɛ kalə sha ghɛa ŋkɛ kwelɛŋe.

¹³ Ma mbe Hɛliyopolis ne, katempəmte yɛ gɛaŋa ba'a kateteremte yɛ ghɛa yɛ shala ta ka Ɛzhipte ŋkɛ le ghwə.›»