Zhɛrɛmi 33 - Ghena ta Shala

Meɗe mɛ ta Mahwətə kezha Zhɛrəzalɛm

¹ Pa ghena ta Mahwətə zhɛne kagezeke nda geva ke Zhɛrɛmi vəa ŋkwa nya nza ŋkɛ kwa daŋgayɛ ki ghɛa ka ya ŋkwa.

² «Wa nya ghena nya geze nde pate hɛɗi, nde hite ŋkɛ ba'a nde veyi ŋkɛ te ŋkwa ŋkɛ, nya nza sləa ŋkɛ kaMahwətə nya:

³ Heka sləa ɗa, katezhɛne ŋa 'ya, katencɛ ŋa wəshi nyi jama jama nyi ɗepema na 'ya.

⁴ Kwa nza ŋkɛ wa nya ghena nya geze 'ya, Shala Mahwətə ta ka Israyɛl te ghəa ghɛa nyi mbe meleme nya, te ghəa yɛ ghɛa ka meghea ka Zhəwda nyi keŋzla ŋzla pɛtɛ, te ghəa zhiɓə ta ki ba'a te ghəa mpa nya:

⁵ Ma nda se mbeli kampa le ka Babilone ne, deke kezha viɗikɛ ghɛa nyi le mbeli nyi mpəmte 'ya va hwepe ta wənəa ɗa ba'a va beze ta ŋkɛ, kwa nza ŋkɛ nahe 'ya kezhɛremte kema ta ɗa va meleme nya tewəmbəreke 'yaghwa mehele ta ŋkɛ.

⁶ Ndagwara katenda nda ghwɛ 'ya yitea mbe ŋkɛ, kateve nda lɛŋelɛ 'ya ke yɛ ghɛa ŋkɛ ba'a katencɛ nda yɛ kwelɛŋe le nza gwezlayɛ 'ya ke mbeli nyi mbe.

⁷ Katezhɛne yɛ Zhəwda le Israyɛl 'ya te ŋkwa nci. Katezhɛne 'ya kaŋa hɛ kala nya vəashi.

⁸ Katepɛ hɛ 'ya va fete nyi menete ɗa hɛ pɛtɛ, katekelemte beze ghena nyi menete ɗa hɛ 'ya pɛtɛ te wənə.

⁹ Tagha gɛ, katenza Zhɛrəzalɛm kawəsə keve ɗa zlama, katsahe nya te 'ya ba'a kazləvəa ɗa mbe hwelefe nyi te hɛɗi lema pɛtɛ, nyi ketefa zeɗe nza nya teve nda 'ya hɛ. Katedake hɛ ba'a katebare bare hɛ va yɛ wəshi ganji le kwelɛŋe nyi teve nda 'ya ke hɛ.»

¹⁰ Wa nya ghena nya geze Mahwətə nya: «Ma ke gheyɛ ka Zhəwda sha geze: ‹Ɓerama hɛɗi, wəndə keɗema wəsə keseɗa shɛ te we.› Kaganda nza meleme nyi mbe Zhəwda le hweŋkwa nyi mbe Zhɛrəzalɛm kaɓerama. Wəndə keɗema wəsə keseɗa shɛ mbe hɛ we. Vatse gɛ ne, katezhɛne mbeli kafa

¹¹ yɛ zlewezla ta gəsəkə, yɛ gaghwe ba'a yɛ ciməa zhilia makwashi le ŋa makwashi te hɛɗi nya. Katezhɛne mbeli kafa yɛ ciməa mbeli nyi ketefə wəshi keseɗa kedzeghe melɛ ketsa hana kase kadzeki Mahwətə, ma tegha hɛ: ‹Tsahe mə Mahwətə nde berete, kwa nza ŋkɛ ganyɛke ŋkɛ, kakiɗi ɗe ta ŋkɛ we.› Kaganda ne, katezhɛne hɛɗi nya 'ya te ŋkwa ŋkɛ.» Nya ya kaghena nya gezete Mahwətə.

¹² Wa nya ghena nya geze Mahwətə nde berete nya zhɛkwa: «Te hɛɗi nya kakwəfi nya, nya ɗema nya yɛ mbeli le wəshi keseɗa te ba'a dzeyi mbe yɛ meleme ta ŋkɛ ne, katezhɛne yɛ gezhi kanza kezha tezhɛne nda mpi ka ya wəshi ke yɛ timɛtia nci le kwia nci kwa.

¹³ Dzeyi mbe meleme nyi hwa ghweme, mbe nyi kwake kwake, mbe nyi mbe Nɛgɛv, mbe hɛɗia Bɛnjamɛn, mbe hɛɗi nyi dzeyi yitea Zhɛrəzalɛm ba'a mbe meleme nyi mbe Zhəwda ne, katezhɛne yɛ timɛti le kwi kadzeghwa te kema ta wəndə nya keteɓela hɛ.» Nya ya kaghena nya gezete Mahwətə.

Kateyipə meɗe mɛa ŋkɛ Mahwətə kadzawa

¹⁴ Ma ke Mahwətə: «Takwa takwa hɛ nya teyipə meɗe mɛ nya meɗeyi nda 'ya ke ka Israyɛl ba'a ka Zhəwda kadzawa kase.

¹⁵ Ma vəa ŋkwa shɛ ne, kateya hwelefe nya ketembele ŋkwa 'ya sawa mbe David. Katemene wəsə nya tiɗiɗi ba'a nya kaganda ŋkɛ te hɛɗi.

¹⁶ Te vəa shɛ gɛ, pələsə tembele Zhəwda ba'a gwezlayɛ tenza Zhɛrəzalɛm. ‹Mahwətə ya kambele ta n'yɛ›, teheka Zhɛrəzalɛm mbeli.»

¹⁷ Wa nya ghena nya geze Mahwətə nya: «Hwelefe ta David nde tenza pelɛ pasla ta meghea ka Israyɛl kaghala ghala.

¹⁸ Katenza ka dzeghe Shala nyi kahwelefefia Lɛvi kwa kema ta ɗa kaghala ghala kezha dzeghe melɛ kwa tere tere, tere wəshi gəmə ba'a dzeghe kweci melɛ keveci keveci.»

¹⁹ Ma ke ghena ta Mahwətə gezeke nda geva ke Zhɛrɛmi:

²⁰ «Wa nya ghena nya geze 'ya, Mahwətə nya: Wərə yɛ kanehemte jikə geva ta ɗa le yɛ veci le viɗi na? Wərə yɛ kafɛake yɛ veci le viɗi kemene geva te vəa nci na? Ewə!

²¹ Tsagha shɛ gɛ ne, kanehemte geva jikə geva ta ɗa le nde mene slene ta ɗa David we. Wəndə shɛ katefɛake ta hwelefe ta ŋkɛ kenza te meghe kaghala ghala we. Tsagha shɛ tenza jikə geva ta ɗa le ka dzeghe Shala nyi kahwelefefi nyi kaka mene ɗa slene.

²² Kala saseregwa nyi pelɛ ghweme nya ɗema wəndə kaɓelate keɗema ndaleghe nya kwa hələ nya ɗema wəndə kadzeghete ne, tsagha teya hwelefe ta nde mene slene ta ɗa David ba'a ka Lɛvi nyi kaka mene slene ta ɗa 'ya.»

²³ Ma ke ghena ta Mahwətə zhɛne gezeke nda geva ke Zhɛrɛmi:

²⁴ «Ashɛ na kefate ghena nya geze mbeli wəka? Ma zəzə hɛ ne, nahe 'ya kebetakɛ ka Israyɛl ba'a ka Zhəwda, hwelefe nyi bake nyi tsehave nyi 'ya. Ma mbeli nyi kegeze ghena nyi kala nya ne, keɓela mbelia ɗa hɛ kakwete hwelefe we.

²⁵ Ama wa nya ghena nya geze 'ya, Mahwətə nya: Nahe 'ya kemenete jikə geva le yɛ veci le viɗi, nahe 'ya keveyi wəshi mahalegə pelɛ ghweme ba'a te hɛɗi.

²⁶ Yewə, wərə wəndə kazəzə gare bete yɛ hwelefe Zhakob le nde mene slene ta ɗa David 'ya na? Keɗema nahe 'ya keɗema nta mbeli nyi te ghə nyi ketesleke hwelefe ta Abraham, Izak ba'a Zhakob na? Ewə! Kwele kwele zhɛ heli 'ya yitea hɛ ba'a katezhɛne hɛ 'ya te ŋkwa nci nya vəashi.»