Zhɛrɛmi 31 - Ghena ta Shala

¹ «Katese kwete hɛ nya tenza 'ya kaShala ta hwelefefia Israyɛl pɛtɛ, pɛtɛ tenza hɛ kambelia ɗa», wa'a ke Mahwətə.

Zhɛne geva ta ka Israyɛl nyi ketene kase

² Wa nya ghena nya gezete Mahwətə nya: «Kwamte te ɓerama ne, nahe 'ya kencɛte nda kemane ta ɗa ke mbeli nyi kembele va mte. Katenza ka Israyɛl gwezlayɛ.

³ Se cakeɗake ne, nahe Mahwətə kencɛte ɗa ghəa ŋkɛ. Ma ke: Kaghala ghala ɗehwe ŋa 'ya, vatse nza 'ya dɛŋe dɛŋe te gha.

⁴ Katezhɛne 'ya kaŋa ŋa zhɛkwa yitea nza na keŋa ŋa, Israyɛl nya kadegheli. Katekele dɛŋwəa ŋa na zhɛkwa kezha tsa nda ke ka wetse le zlama hwa gəsəkə.

⁵ Katezhɛne na kamɓe yɛ rɛzɛŋe pelɛ yɛ wəmbə nyi mbe Samari. Mbeli nyi ketemɓe hɛ ka tenda ya ta nci.

⁶ Katese hɛ nya tezlape ghena ka ya ŋkwa pelɛ wəmbə nyi mbe Ɛfrayim: Sate mə! Mbi ɓəmə kadzeme Siyon sha Shala Mahwətə ta ɓəmə.»

⁷ Wa nya ghena geze Mahwətə nya: «Tsa mə gaghwe kezha hwelefe ta Zhakob, kemaneve mə wəndə nya te ghəa hwelefefi le zlama! Tsahe mə ŋkɛ, tsa mə gaghwe, ma pe yɛ sha geze: Mahwətə kambele mbelia ŋkɛ, ka Israyɛl nyi ketene.

⁸ Katezhɛne hɛ 'ya kase se te hɛɗi nya laka bela kwa gwela, katetsene hɛ 'ya se te mendɛkwe ta hɛɗi. Hwa hɛ ne, ka ghwələa kɛfi, ka gweleba, mi nyi le hwə ba'a nyi kaka mewete, katezhɛne geva hɛ kase kawəvəsəa mbeli kwele kwele.

⁹ Katese hɛ le nehwene ba'a le mpi dzeve, kategweɗakwe hɛ 'ya. Katekele hɛ kadzawa hələ nyi nza yɛmə dzawa kwa hweŋkwa nya dekwede, nya ɗema tehene kwa. Kwa nza ŋkɛ yitenyɛa ka Israyɛl 'ya, Ɛfrayim ya katezhɛa wəzege ta ɗa.»

¹⁰ Gheyɛ kweci hwelefefi, fa mə ghena ta Mahwətə, zlape nda mə ke hɛɗi nyi cakeɗake. Ma pe yɛ sha geze: «Tsene yatsene ka Israyɛl wəndə nya ketazemte hɛ kwetɛ kwetɛŋe, ya yaya hɛ ŋkɛ kala wəndə nya keya wəshi.»

¹¹ Kwa nza ŋkɛ Mahwətə nde mbeɗeke Zhakob, gheŋkɛ nde mbeɗeke hɛ shave mbe dzeve ta wəndə nya berete ma ke hɛ.

¹² Katese hɛ le cimə zlama pelɛ ghweme ta Siyon. Katehwɛ kase yitea wəshi ganjia Mahwətə, yitea ha, tɛ mɛnɛfɛ ba'a n'yi, yitea yɛ timɛti, kwi le sla. Katenza hɛ kala ntsa nya hwɛ yɛmə dzeyi mbe. Katezhɛne hɛ kanza kepahe pahe we.

¹³ Ma tsagha, katewetse deghelɛshi va zlama, tsagha yɛ dɛgwəa hɛɗi le meha mehɛɗi. Katezhɛre nehwene ta nci 'ya kazlama, kategweɗakwe nda wənə 'ya ke hɛ. Kwa sebe ta yaka ne, zlama nde tenza shɛ.

¹⁴ Katezeme nda sli nyi kamerege 'ya ke ka dzeghe Shala, behe tenza mbelia ɗa va wəshi ganji. Nya ya kaghena nya gezete Mahwətə.

¹⁵ Wa nya ghena nya geze Mahwətə nya: «Kafefa lewela mbeli se mbe Rama, nehwene kwa pɛ wəndə. Rashɛl nde nehwene ŋwalea nta. Kaɗe nde kagweɗakwe kwa nza ŋkɛ nahe ŋwalea nta kempənji we.»

¹⁶ Ama wa nya ghena nya geze nda Mahwətə nya: «Nehwenema na ma, sehwemte nehwene, kwa nza ŋkɛ katekemave zhɛme ta slene ta ŋa na. 'Ya Mahwətə nde gezete. Katezhɛneke geva ŋwalea ŋa se te hɛɗia ka jaga ta nci.»

¹⁷ Ma ke Mahwətə: «Zəzə nya neghe mbeli ya shɛ va hwelefe ta ŋa, katezhɛneke geva ŋwalea ŋa kadzete hɛɗia nci.

¹⁸ Kafefa 'ya deŋwa nda nehwene ka Ɛfrayim, ma ke hɛ: ‹Mahwətə, dzawe se na ka'yɛ n'yɛ, kala nya 'yɛ mca nya keɗema ke'yɛ mbeli. Ama zhɛreke n'yɛ kase sha gha kezha kanza n'yɛ kaŋa ŋa fəyitekeghə. Kwa nza ŋkɛ gha ya kaMahwətə Shala ta n'yɛ.

¹⁹ Kaganda ne, nahe n'yɛ kelə n'yɛ cakeɗake le gha, ama tsetsenya ne, mbe zəzə ghen'yɛ. Nahe na kencɛte n'yɛ fete ta n'yɛ, dzeve yampi ghen'yɛ tsetsenya. Mba zləvə te ghen'yɛ we, hawe ya te ghen'yɛ va wəshi nyi menete ghen'yɛ kwa nza ghen'yɛ kaŋwale, kwa ghə nde va ghen'yɛ.›»

²⁰ Ma ke Mahwətə: «Ɛfrayim ya kawəzege ta ɗa nya ɗehwe 'ya, kwa jiwəni ta wəzege ta ɗa ŋkɛ. Yayata və nya ŋele ŋkɛ 'ya ne, nda zəzə yazəzə ŋkɛ, Kwele kwele sla helia ɗa yite, Kaganda ne, kazhɛ ɗa heli yite.»

²¹ Mɓete ghala dzeyi mɛa hweŋkwa ta ŋa, mɓete yɛ pelɛ. Ntsehwele yitea hweŋkwa nya kelete nya na, yitea hweŋkwa nya dzeghwa nya na kwa. Zhɛneke geva Israyɛl nya kadegheli, zhɛneke geva kadzembe yɛ meleme ta ŋa.

²² Wəzha kwa fama ghena, pa te nyama və tendeŋe na wa? Kwa nza ŋkɛ, nahe Mahwətə kepate wəsə mɛnɛfɛ te hɛɗi: male nde tezele za nta.

Katezhɛne Mahwətə kaŋa yɛ Zhəwda le Israyɛl

²³ Wa nya ghena nya geze Mahwətə nde berete, Shala ta ka Israyɛl nya: «Vəa ŋkwa nya zhɛnate yɛ hɛɗia Zhəwda le meleme nyi mbe 'ya te ŋkwa nci ne, katezhɛne mbeli kageze ghena nyi: ‹Wəpikɛ ŋa Mahwətə ghweme ta Siyon nya keveyi geva tekeleke, ŋkwa nya nza mbele pelɛ.›

²⁴ Ma tsagha, katenza mbeli nyi hwa gamba ba'a nyi mbe yɛ meleme ta Zhəwda jikə te hɛɗi nya, tsagha ka wəza ba'a ka ya wəshi.

²⁵ Kwa nza ŋkɛ katelɛnɛake nda wənə 'ya ke nyi keleɓenji, katezeme nda wəshi 'ya ke nyi kepahe pahe.»

²⁶ Ma kwa feɗeghe 'ya ne, pa 'ya fave kashiwə ganyɛ shiwəa ɗa.

²⁷ Ma ke Mahwətə: «Takwa takwa 'ya kateŋkisə mbeli ba'a wəshi keseɗa te hɛɗia Israyɛl ba'a ŋa Zhəwda kala nya ŋkisə ya ta wəshi mbeli mbe wəve.

²⁸ Pa te və nya ne, nahe 'ya kezhɛrave nda wəmbə ke hɛ, nteɗe, tsasle, ŋzla, beze ba'a mene wəsə kwa ndiremi ya kaslene ta ɗa. Ama tsetsenya ne, 'ya katezhɛre nda kema ke hɛ, zhɛne kaŋa ba'a kamɓe ka tenza kaslene ta ɗa. 'Ya Mahwətə nde gezete.

²⁹ Ma tsagha gɛ, katezhɛne mbeli kageze ghena ŋela nya we: ‹Mendahwepələa rɛzɛŋe yampeɗehwe ka yitehɛnyɛa ŋwale, ama ŋwale yaghelamenji slene kwa mɛ va hɛ.›

³⁰ Kwa nza ŋkɛ, ma kempeɗehwe mendahwepələa rɛzɛŋe wəndə ne, wəndəa shɛ yaghelame slene kwa mɛ ve. Yayata wəndə katemte va jaɗafa ta ŋkɛ.»

³¹ Ma ke Mahwətə: «Katese hɛ nya temene mɛnɛfɛa jikə geva 'ya le ka Israyɛl ba'a ka Zhəwda.

³² Tekeleke tenza ŋkɛ le jikə geva nya menete 'ya le ka shihɛ nci, kwa keseve hɛ 'ya te dzeve kezha fə hɛ shave mbe Ɛzhipte. Pa hɛ nehemte jikə geva shɛ, ndagwara 'ya nde se kande sleke hɛ. 'Ya Mahwətə nde gezete.

³³ Wa nya jikə geva nya temene 'ya le ka Israyɛl te vecia shɛ nya: katerafe wəshi mahalegəa ɗa 'ya te yɛ pelɛ nyi slapesla slapesla we, ama mbe mehele ta nci, katerafe hɛ 'ya kwa wənəa nci. Katenza 'ya kaShala ta nci, hɛ perə, kambelia ɗa tenza. 'Ya Mahwətə nde gezete.

³⁴ Wəndə shɛ hwa hɛ kateteke nda ɗepe ɗa ke nde ghedəkwəa ŋkɛ keɗema ke menənyɛ we. Kwa nza ŋkɛ pɛtɛ teɗepete ɗa hɛ, se te nya ɓɛhwɛ hwa'a te nya wəba. Katekelemte fete ta nci 'ya te wənə, kazhɛne 'ya kazəzə beze ghena ta nci we. 'Ya Mahwətə nde gezete.»

³⁵ Wa nde veyi veci te ghweme kezha waŋe ŋkwa heveci wa? Wa nde ve nda hweŋkwa ke yɛ tere le saseregwa kawaŋe ŋkwa heviɗi wa? Wa nde gaŋkəɗə ndərə yitea gaŋkeɓe nde wa? Mahwətə nde berete ya kasləa ŋkɛ.

³⁶ Vatse gɛ, wa nya ghena nya geze ŋkɛ nya: «Ma nda nahe 'ya keyɛte kazanji sebe te wəshi ketseɓate geva te hɛɗi ne, nda kateyɛ 'ya kezha ɗema ka Israyɛl kanza kahwelefe nya kaghala ghala perə.»

³⁷ Wa nya ghena nya geze Mahwətə nya: «Ma nda wərə wəndə kadzeghete biya ta ŋkwa nya kedzeme yitea ghweme, keɗema kaɗepete lɛamea hɛɗi ne, tagha gɛ, katebete pɛtɛa ka Israyɛl 'ya va wəsə kwa ndiremi nyi menete hɛ.» Nya ya kaghena nya geze Mahwətə.

³⁸ Ma ke Mahwətə: «Katese və nya tezhɛne mbeli kaŋa zlia Zhɛrəzalɛm kazləvəa ɗa, se mɛa ŋkwa keya ŋkwa ta Hananɛyɛl hwa'a te mɛ degha nya te megwekwe ta ŋkwa.

³⁹ Katezhɛne mbeli kadzeghe ghala ta meleme tiɗiɗi hwa'a yitea wəmbəa Garɛb, slə tagha ne, hwa'a mbe Gowa telə ŋkɛ.

⁴⁰ Pɛtɛ zlərəa ka kempə mpə ba'a ŋa pəsəɗə, pɛtɛa ŋkwa nyi kedzawa hwa'a kwa zlərəa Sɛdron ba'a nyi kelə hwa'a te megwekwe ta mɛ degha ta Gədəwə laka ŋkwa kesame ta veci ne, pɛtɛ tenza hɛ kaŋkwa nyi keveyi geva tekeleke kezha Mahwətə. Wəsə shɛ kazhɛne mbeli kanteɗe keɗema kaŋzla te hɛ we.»