Zhɛrɛmi 30 - Ghena ta Shala

Meɗe mɛa Shala kezha mbelia ŋkɛ

¹ Ma ke Mahwətə sha Zhɛrɛmi:

² «Wa nya ghena nya geze Shala Mahwətə ta ka Israyɛl nya: Rafeyi ghena nyi geze ŋa nyi 'ya pɛtɛ mbe palepa.

³ Katese kwete veci nya tezhɛne mbelia ɗa, ka Israyɛl le ka Zhəwda 'ya te ŋkwa nci nya vəashi. Katezhɛne hɛ 'ya kase kadzete hɛɗi nya ndeke nda nya 'ya ke ka shihɛ nci, katekele ŋkɛ hɛ kawəsə kezeme ghɛ, wa'a ke Mahwətə.»

⁴ Wa nyi ghena nyi geze Mahwətə te ghəa ka Israyɛl le ka Zhəwda nyi:

⁵ Wa nya ghena nya geze Mahwətə nya: «Nahe mə kefate yɛ lewela ghazlənə. Kwelɛŋe we, ama ghazlənə nya wəba.

⁶ Zelakɛ mə ba'a 'yɛwakɛ mə kenza ŋkɛ kaya wəzege za. Tsema newe zhili 'ya pɛtɛ le dzeve te dəŋə kala male nya keheha va ya wa? Va wa nza kema ta nci tɛarawe rawe wa?

⁷ Ayaga! Veci nya dzawe ŋkɛ, kwete veci shɛ kayipə geva le we. Vəa yaka ŋkɛ sha mbelia Zhakob! Ama pɛtɛ tembele hɛ ve.»

⁸ Ma ke Mahwətə nde berete: «Ma te vecia shɛ gɛ, kateɓele sheghwəa nya te welɛ va hɛ kala sla kewəza 'ya, katetsasle zewe lɛa nci 'ya. Katezhɛne hɛ kanza kaka mavashia kweci hwelefefi we.

⁹ Ama katefa nda ghena hɛ ke Shala Mahwətə ta nci ba'a ke David, meghe nya teve 'ya te ghəa nci.»

¹⁰ Ma ke Mahwətə: «Gha, nde mene slene ta ɗa Zhakob, ghazlənəma na ma. Nzama mehele ta ŋa ketaze taze ma Israyɛl! Katembele ŋa 'ya se te hɛɗi nyi cakeɗa ba'a sebe ta ŋa se te hɛɗi nya nza hɛ kaka mavashi. Zhakob, katezhɛne geva na kase, waɗe ba'a gwezlayɛ tenza na, wəndə shɛ katezhɛne ghakɛ ŋa we.

¹¹ Ma 'ya, 'ya Mahwətə: yitea gha 'ya kezha mbele ŋa. Kateza sebe 'ya te kweci hwelefefi nyi tazeyi ŋa 'ya hwa hɛ pɛtɛ, ama gha ne, kateza sebe 'ya te gha we. Nahe 'ya kese ka'yɛ ŋa, ama le dzawe we, kasərə ŋa 'ya kala wəndə nya kemenetema fete we.»

¹² Wa nya ghena nya geze Mahwətə nya: «Zhɛrəzalɛm, katekiɗi ndiremi nya te gha we, katempi zhia ŋa we.

¹³ Wəndə shɛ kayakɛ ŋa we. Ma ghalanza ne, kampi zhi mbeli, ama ghwɛ shɛ yitea ŋa ŋa we.

¹⁴ Pɛtɛa ka meghwateshia ŋa kezaghəyite ŋa, kezhɛne hɛ kaɓela ŋa we. Kwa nza ŋkɛ ne, nahe 'ya keɗate ŋa kala wəsə nya nza 'ya kande jaga ta ŋa, dzawe se 'ya ka'yɛ ŋa tewəmbəreke wəba ta fete ta ŋa, tewəmbəreke kwelea jaɗafa ta ŋa.

¹⁵ Wa raberə tsa lewela na va ndiremi nya te gha, va zhia ŋa nya keɗema nya kampi wa? Va wəba ta fetea nyi menete na ba'a va kwelea jaɗafa ta ŋa menete ŋa 'ya kala nyagha.

¹⁶ Ama pɛtɛ tezehwe geva mbeli kezeme ŋa nyi, pɛtɛ tefəmte geva ka jaga ta ŋa kadzete kwete hɛɗi kaɗema ghala kwa, pɛtɛ tezləgwə wəshia mbeli nyi kezləgwə ŋa ŋa mbeli ba'a pɛtɛ tefəhwe wəshia mbeli nyi kefə ŋa ŋa mbeli.

¹⁷ Ma gha ne, katebazhaŋe ŋa 'ya, katempi yɛ zhia ŋa 'ya, va nya heka ŋa mbeli ‹kaKwazerema›, ‹kaSiyon nya ɗema mbeli kaɓela›», wa'a ke Mahwətə.

¹⁸ Wa nya ghena nya geze Mahwətə nya: «Katezhɛne ka Israyɛl 'ya kadzete ŋkwa nci nya vəashi, katezhɛ heli 'ya yitea ghɛa nci. Kateŋa geva yɛ meleme te ŋkwa nci nyi vəashi, kadzete ŋkwa nci tezhɛne geva ghɛ nyi ganji ganji.

¹⁹ Katefa yɛ cimə zlama ba'a yɛ zlewezla mbeli pelɛ te ŋwela. Katekiɗi hwelefe ta Zhakob we, kwa nza ŋkɛ kwele kwele tembake hɛ 'ya. Kazhɛne mbeli kateyiɗə ŋayɛ we, kwa nza ŋkɛ kateve zləvə 'ya te gheyɛ.

²⁰ Katenza yɛ kaŋwalea Zhakob kala nya vəashi: katezhɛne yɛ katsene kwa kema ta ɗa ba'a kateɗa mbeli nyi kesa ŋayɛ yaka 'ya.»

²¹ Ma ke Mahwətə: «Kwete wəndəa ŋayɛ nde tenza kameghea ŋayɛ, wəndə nya keya hwa gheyɛ nde tesleke ŋayɛ. Kateve nda hweŋkwa 'ya kahende ɗa geva, kwa nza ŋkɛ wa nde ɗema kaghazlənə va hende ɗa geva wa?

²² Katenza yɛ kambelia ɗa, 'ya perə, katenza 'ya kaShala ta ŋayɛ.»

²³ Wa nya masefafelea Mahwətə nya kase: nahe hwepe wənəa ŋkɛ kepesleyi geva. Wa nya sefə nya wəba kentsa, geva yazhɛre ŋkɛ kənəa ghəa ka 'yaghwa mehele.

²⁴ Kagweɗakwe tse ta hwepe wənəa Mahwətə keɗema ŋkɛ kemenemte wəsə nya tarete ŋkɛ we. Ma te kwete hɛ ne, katefave yɛ.