Zhɛrɛmi 29 - Ghena ta Shala

Palepa ke mbeli nyi ghate mbeli kafəhwe

¹ Wa nyi ghena nyi te palepa nya ghweneke nde mɛ ŋkwa Zhɛrɛmi shave pelɛ Zhɛrəzalɛm ke mbelia jama, ka dzeghe Shala, ka mɛ ŋkwa ba'a pɛtɛa mbeli nyi fəmte Nabəkodonozor shave mbe Zhɛrəzalɛm kajive Babilone,

² kwa sebe ta nya shavenji yɛ meghe Yekoniya, meghekɛ, ka mene slene nyi yite, mbelia jama nyi mbe Zhəwda ba'a nyi mbe Zhɛrəzalɛm, ka caŋa caŋa ba'a ka gezla wəshi mbe Zhɛrəzalɛm.

³ Pa ŋkɛ ndeke nda ke yɛ Ɛlasa, wəzege ta Shafan le Gemariya, wəzege ta Hilkiya, mbeli nyi ghweneghe nda Sɛdɛsiyas, meghea ka Zhəwda ke Nabəkodonozor, meghea ka Babilone. Ma ke palepa shɛ:

⁴ «Wa nya ghena nya geze nda Mahwətə nde berete, Shala ta ka Israyɛl ke mbeli nyi fəmte ŋkɛ pɛtɛ shave mbe Zhɛrəzalɛm kajive Babilone nya:

⁵ ‹Ŋa mə yɛ ghɛ kezha nza yɛ mbe, mɓe mə yɛ wəfe kezha zeme ya ta nci yɛ.

⁶ Wəme mə mi kezha ya ŋwale tezhili le ŋwalea kwɛ. Wəmave nda mə mi ke ŋwale tezhilia ŋayɛ ba'a ve nda mə ŋwalea kwɛa ŋayɛ ke zhili yitea ya ŋa nci hɛ ŋwale. Yate mə ya pelɛagha, zama sebe te gheyɛ ma!

⁷ Mene mə slene kezha kele meleme nya fəyi ŋayɛ Mahwətə mbe kajive mbe kema mbe kema, səkwə mə ghə yite kezha melemea shɛ, kwa nza ŋkɛ se mbe kwelɛŋea ŋkɛ se ŋa ŋayɛ.›

⁸ Wa nya ghena nya geze Mahwətə nde berete, Shala ta ka Israyɛl nya: ‹Mba yɛ kesərəakɛ ka mɛ ŋkwa nyi hwa gheyɛ kaghwete ŋayɛ, ya ka ɗepe wəshi nyi ketemene geva. Mba yɛ keve mehele ta ŋayɛ te mbeli nyi kencɛ ŋayɛ ghena nyi mbe shiwəa ŋayɛ.

⁹ Te sləa ɗa geze ŋayɛ ghena ŋayɛ hɛ ke hɛ, ama tseŋwə yasla hɛ. Keghwenakɛ hɛ 'ya we›, wa'a ke Mahwətə.

¹⁰ Wa nya ghena nya geze Mahwətə nya: Ma kemenete va mberefaŋemsə berete ta Babilone ne, katezhɛ heli 'ya yitea gheyɛ ba'a kateyipə wəsə ganyɛ nya meɗeyi 'ya 'ya kadzawa: katezhɛne ŋayɛ kase teke, mbe Zhɛrəzalɛm.

¹¹ Ma 'ya ne, nahe 'ya keɗepe wəshi nyi zəzə 'ya te nza ta ŋayɛ, Kenza kawəshi nyi ndiremi ndiremi we, ama wəshi ganji: kateve ŋayɛ yɛ nza le mbele nyi vate ghə mbeli te 'ya, wa'a ke Mahwətə.

¹² Kateheka ɗa yɛ, katese yɛ kasəkwə ɗa, ma 'ya le ŋa ɗa, katezhɛne ŋayɛ 'ya.

¹³ Katezele ɗa yɛ, katesləyi ɗa yɛ: kwa nza ŋkɛ, le wənə kwetɛŋe tezele ɗa yɛ.

¹⁴ Katepele ghəa ɗa 'ya kanakɛ ɗa yɛ, katezhɛne ŋayɛ 'ya te ŋkwa ŋayɛ, katetsene ŋayɛ 'ya shave hwa kweci hwelefefi ba'a se te ŋkwa nyi tazeyi ŋayɛ 'ya, katezhɛne ŋayɛ 'ya kase kadzete ŋkwa nya fəmte ŋayɛ 'ya, wa'a ke Mahwətə.

¹⁵ Ma nda geze ŋayɛ Mahwətə kala nya ne, va nya zəzə yɛ nahe ŋkɛ kendeke ŋayɛ ka mɛ ŋkwa mbe Babilone.

¹⁶ Wa nya ghena nya geze nda Mahwətə ke meghe nya mentishɛ pelɛ pasla ta David ba'a ke mbeli nyi kenzanji mbe melemea shɛ pɛtɛ, ke ka menəhɛ ŋayɛ nyi ɗema mbeli kefəhwe ŋayɛ le hɛ nya:

¹⁷ Wa nya ghena nya geze Mahwətə nde berete nya: Kateghwene nda mpa, ma ba'a ba 'ya ke hɛ. Katezhɛre hɛ 'ya kala ya ta dasekwa nyi kazhi kazhi kashɛma mbeli zeme.

¹⁸ Katekeka hɛ 'ya le mpa, ma ba'a ba. Katebare bare mbeli nyi te hɛɗi nyi ketenakɛ hɛ pɛtɛ te hɛɗi lema va ghazlənə. Mbe hɛɗi nyi tetazeyi hɛ 'ya ne, hɛ katenza kawəsə kebezla ŋkwa keɗema kawəsə kwa ndiremi, kawəsə keghazlənə keɗema kawəsə hawe.

¹⁹ Kwa nza ŋkɛ, kese hɛ kafa ɗa ghena we, wa'a ke Mahwətə. Ndagwara kevə kevə se 'ya kaghwene nda ka mene slene ta ɗa nyi kaka mɛ ŋkwa ke hɛ. Ama kese hɛ kafa nda ghena ke hɛ we, wa'a ke Mahwətə.

²⁰ Ma gheyɛ mbeli nyi fəmte Mahwətə shave mbe Zhɛrəzalɛm kajive Babilone ne, fa mə ghena ta Mahwətə!

²¹ Wa nya ghena nya geze Mahwətə nde berete, Shala ta ka Israyɛl te ghəa yɛ Akab, wəzege ta Kolaya le Sidekiya, wəzege ta Masɛya nyi kesla ŋayɛ tseŋwə te sləa ɗa nya: Katefə nda hɛ 'ya ke Nabəkodonozor, meghea ka Babilone nya ketempə hɛ kwa ntsə ta ŋayɛ.

²² Te sləa mbeli nyi bake nyi tebezla ŋkwa ka Zhəwda nyi kefəghe geva nyi kajive Babilone. Kwa nza ŋkɛ: ‹Pa Mahwətə menete ŋa kala yɛ Sɛdɛsiyas le Akab nyi teremte meghea ka Babilone mbe ghwə›, ke mbeli sha tebezla ŋkwa.

²³ Mene wəsə hawe hwa ka Israyɛl fete ta nci, vale tahe yamene hɛ le mia ka ghedəkwəa nci. Nahe hɛ keslate tseŋwə te sləa ɗa, ndagwara keɗema 'ya kendeke nda hweŋkwa ke hɛ. Nahe 'ya keɗepe ghena shɛ pɛtɛ, 'ya nde negha fete te hɛ.» Nya ya kaghena nya gezete Mahwətə.

Palepa nya rafete Shemaya

²⁴ Ma pa na sha Shemaya, nde Nɛhɛlam:

²⁵ Wa nya ghena nya geze Mahwətə nde berete, Shala ta ka Israyɛl nya: Nahe na keghweneghe nda yɛ palepa ke ka Zhɛrəzalɛm pɛtɛ, ke nde dzeghe Shala Sefaniya, wəzege ta Masɛya ba'a ke ka dzeghe Shala pɛtɛ te sləa ŋa, ma pa na:

²⁶ «Mahwətə nde veyi ŋa te ŋkwa nde dzeghe Shala Yoyada kezha newe ghweme te ghɛa Mahwətə va ka gezhia hɛɗi nyi kezhɛre ghəa nci kaka mɛ ŋkwa, hwepete hɛ le zewe lɛ keɗema te dəŋwə lɛ.

²⁷ Va wa ɗema na keneheke nda ntsə ke Zhɛrɛmi, nde Anatot nya kegeze ghena kelɛŋə kwa kema ŋayɛ wa?

²⁸ Tsetsenya tsetsenya ghweneke n'yɛ palepa ŋkɛ kashave Babilone. Ma ke: ‹Kwele kwele tetemə yɛ pelɛagha! Ŋa mə ghɛ kanza ki, mɓe mə wəfe kezha zeme ya ta nci.›»

²⁹ Pa nde dzeghe Shala Sefaniya jaŋgate nda palepa shɛ ke nde mɛ ŋkwa Zhɛrɛmi.

³⁰ Tagha, Ma ke Mahwətə sha Zhɛrɛmi:

³¹ «Ghweneghe nda ghena nya ke mbeli nyi fəhwe nyi mbeli: ‹Wa nya ghena nya geze Mahwətə te Shemaya, nde Nɛhɛlam nya: Nahe Shemaya kegezete ŋayɛ ghena te sləa ɗa, ama keghwenakɛ ŋkɛ 'ya we. Nahe ŋkɛ kegwəfəte ŋayɛ ghə le tseŋwə.

³² Vatse gɛ, wa nya ghena nya geze 'ya Mahwətə nya: 'ya katencɛ nda mehele kwa ndiremi ke Shemaya, nde Nɛhɛlam, tsagha ke hwelefe ta ŋkɛ. Wəndə shɛ katenakɛ zeɗe nza nya temene nda 'ya ke mbelia ɗa mbe hwelefe ta ŋkɛ we. Kwa nza ŋkɛ ne, nahe ŋkɛ keghwetete mbelia ɗa kaɗema ghena ta ɗa. Nya ya kaghena nya gezete Mahwətə.›»